Алматылықтар "Халық қатысатын бюджет" жобасына белсенді қатысуда.
1 қыркүйектен бастап өтінімдерді қабылдау басталды. Алғашқы кездің өзінде 430 жобалық ұсыныс келіп түсті, - деп хабарлайды Aqshamnews.kz.
Қала тұрғындары көгалдандыру, аулалар мен көшелерді абаттандыру, тротуарлар мен арықтарды жөндеу, қоғамдық кеңістіктерді құру және жарықтандыру, балалар алаңқайы мен спорт алаңдарын орнату, сондай-ақ санитарлық тәртіпті қамтамасыз ету бойынша жобаларды ұсынуда.
Өтінімдерді қабылдау 2025 жылдың 30 қыркүйегіне дейін жалғасады. Барлық ұсыныстарды сараптамалық кеңестер мен аудан әкімдіктері қарайтын болады. Дауыс беру қорытындысы бойынша көп қолдауға ие болған жобалар Алматыда 2026 жылы жүзеге асырылатын болады.
Өтінімдерді budget.open-almaty.kz порталы арқылы беруге болады. Ол үшін жобаның атауы мен сипаттамасын, орналасқан жерінің мекенжайын, фотосуретін немесе эскизін, сондай-ақ шығындар сметасын көрсету қажет.
Еске салсақ, жобалық ұсыныстар бірқатар шарттарға сәйкес келуі тиіс:
· бір автор—бір өтінім—бір нысан;
· аудан аумағындағы жалпы пайдалану нысаны;
· жобаның ең жоғары құны — 294,9 млн теңге.
Қажетті кеңесті Алматы қаласының аудандық әкімдіктерінен, сондай-ақ Open Almaty әкімдігінің Қоғамдық қабылдау бөлмесінен 224 39 29 (ішкі 203) телефоны арқылы алуға болады.