Қазақстан Республикасының Мәдениет және ақпарат министрлігінің қолдауымен Жамбыл атындағы Қазақ мемлекеттік академиялық филармониясы мен Б.Байқадамов атындағы мемлекеттік хор капелласының 90 жылдығы аясында Қазақстан Халқы Ассамблеясының 30 жылдығына арналған «Гүл Алматы.
«Flower city» фестивалінің-концерті өтті, деп хабарлайды aqshamnews.kz.
Филармонияда биыл дәстүрлі түрде төртінші жыл қатарынан өткізіліп отырған фестивальдің мақсаты - еліміздегі балалар хорын дамытып, жас таланттардың танылуына ықпал ету. Фестивальде Қазақ Ұлттық Қыздар Педагогикалық университетінің қыздар хоры арнайы қонақ болып, концертте өнер көрсетті.
-Бүгін филармониямыздың үлкен залында дәстүрлі түрде төртінші рет «Гүл Алматы» фестивалінің концерті өтіп жатыр. Фестивальге қаламыздағы ең үздік, кәсіби деңгейлері биік балалар хоры өнерлерін көрсетті. Мемлекеттік хор капелласы әрқашан балаларға қолдау берер фестивальді қуана-қуана өткіземіз. Гүл Алматымыз өркендей берсін, - дейді Қазақстанның еңбек сіңірген қайраткері Бейімбет Демеуов.
Фестиваль қатысушылары «Қоӊырау» кіші хоры, «Көкек» балалар хоры, «Ақ тілек» ұлдар хоры және тағы да басқа балалар мен жасөспірімдердің орындаушылар тобы ірі ұжым Б.Байқадамов атындағы мемлекеттік хор капелласымен бір сахнада өнер көрсетті.
-Фестивальге біз 2023-ші жылдан бері шақырту алып, балалар өз өнерлерін көрсетіп келеді. Дәстүрлі түрде болғандықтан, біз сағына, үлкен дайындықпен күтеміз. Өзімнің және «Ақ тілек» балалар хоры атынан ұйымдастырушыларға алғыс білдіремін. Жасөспірім таланттарға қолдау берер «Гүл Алматы» фестивалінің ғұмыры ұзақ болса екен деген тілек білдіремін, - дейді А.Жұбанов атындағы дарынды балаларға арналған РҚМММИ «Ақ тілек» ұлдар хорының жетекшісі Айнура Уалиханқызы.
Фестиваль – тек концерт емес, бұл – балалар мен жасөспірімдердің бойындағы шығармашылықты оятатын, оларды сахна мәдениетіне, өзара достық пен ынтымаққа баулитын тәрбиелік мәні зор өнер мерекесі. Халықтар достығы, бейбітшілік пен бірлік, дарынды жас ұрпақтың болашағына сенім — мерекелік кештің негізгі идеясы болды.
-Біз бүгінгі фестивальде Моцарттың, Абай Құнанбаевтың «Желсіз түнде жарық ай» шығармасын орындаймыз. Фестивальге биыл да қатысатынымызды естігенде қуанып, қызу дайындықпен келдік, - дейді «Ақ тілек» ұлдар хорының орындаушысы Зияш Абдуллакбар.
Концерттік бағдарламада қазақ және әлем классиктерінің туындылары, заманауи авторлық композициялар мен түрлі этностардың музыкалық мұрасы орындалды. Концерт соңында фестивальге қатысушы барлық ұжымдарға ұйымдастырушылар атынан алғыс хат пен арнайы сыйлықтар табыс етілді. Қара шаңырақ қабырғасында әлі де жасөспірім таланттардың өнер жолына қолдау берер жоба жалғасын табатын болады.