Бүгін ҚР Мәдениет және ақпарат министрлігінің қолдауымен Жамбыл атындағы Қазақ мемлекеттік академиялық филармониясы мен Б.Байқадамов атындағы Мемлекеттік хор капелласының 90 жылдығы және Н.Тілендиевтің 100 жылдық мерейтойларына орай суретші студент жастардың өнерін насихаттау мақсатында Т. Жүргенов атындағы Қазақ ұлттық өнер академиясы мектеп-интернат, колледжі және О. Таңсықбаев атындағы Алматы сәндік - қолданбалы өнер колледждерінің бірлескен «Филармония жас суретшілер көзімен» атты пленэрлік жұмыстардың көрмесі қойылды.
26-30 мамыр аралығында ұйымдастырылған пленэрде екі өнер колледжінен іріктеліп алынған 10 студент ғасырға жуық тарихы бар филармония ғимаратының іші мен сыртқы көрінісін өзіндік көзқарастарымен композицияларына ұсынды. Жас суретшілердің салған шығармашылық туындылары филармония фойесіне қойылып, атаулы мерейтойлар тақырыбында көрме жасалды. Шарада ҚР еңбек сіңірген қайраткері Болат Сырлашұлы, Қазақстан Суретшілер одағының мүшесі Серікбай Әлжанов, Мәдениет саласының үздігі Мәлік Әуезханұлы, Т.Жүргенов атындағы Қазақ Ұлттық өнер академиясының профессоры Жұмақын Қайрамбаев, кескіндеме өнерінің қайраткерлері жас суретшілердің туындыларын бағалап, шығармашылық шабыт сыйлады.
«Филармония жас суретшілер көзімен» жобасы – мәдениет пен өнер саласындағы ұрпақтар сабақтастығын нығайтудың және жас дарындарды қолдау ісінің бір бағытының айқын көрінісі. Ұлттық мәдениетімізді ұлықтап, ұрпаққа ұлттық құндылықтарды насихаттау жолында қара шаңырақта әлі де игі бастамалар жалғасын табады.