Алматыдағы Достық үйінде Қазақстан халқы Ассамблеясының этномәдени бірлестіктері өкілдерінің қатысуымен дөңгелек үстел өтті.
Кездесуде ҚР Парламенті Сенатының депутаты Нурия Ниязова сөз сөйлеп, жаңа Конституция жобасының негізгі ережелері мен алдағы референдум туралы түсіндірме берді, – деп хабарлайды aqshamnews.kz тілшісі.
Жаңа Конституция жобасына тоқталған сенатор бұл жай ғана формалды түзетулер емес, Негізгі заңды жүйелі түрде жаңарту екенін атап өтті.
6-бапқа қатысты ол идеологиялық және саяси әртүрліліктің бекітілуімен қатар, елдің егемендігі мен тәуелсіздігін қорғау қағидалары көрініс тапқанын айтты. 9-бапта қазақ тілінің мемлекеттік мәртебесі сақталып, сонымен бірге Қазақстан халқының тілдері аталғаны елдің көпұлтты сипатын көрсететінін жеткізді.
Сондай-ақ адам құқықтарының кепілдіктеріне ерекше назар аударылды. 19-бапта қорғану құқығы, өзіне қарсы куәлік бермеу және бір құқық бұзушылық үшін қайта жауапқа тартуға тыйым салу нормалары бекітілгені айтылды. 21-бапта жеке өмірге қол сұқпау, жеке деректерді, банк құпиясын және хат-хабар алмасу құпиясын қорғау мәселелері қамтылған.
Кездесу барысында сөз бостандығы, еңбек ету құқығы және отбасы институтын қорғау нормалары да талқыланды.
Дөңгелек үстелге қатысушылар ұсынылған өзгерістер жөнінде пікір алмасып, ұлтаралық келісімді сақтау маңызын атап өтті және референдумға қатысуға шақырды.
Еске салайық, Мемлекет басшысының Жарлығына сәйкес 15 наурызда Қазақстанда жаңа Конституцияны қабылдау бойынша республикалық референдум өтеді.
