Алматыда есірткі қылмысына қарсы іс-қимыл жөніндегі бөлімшенің қызметкерлері мен "Буран-314" патрульдік экипажының бірлескен жұмысы нәтижесінде таңға жуық Түрксіб ауданындағы жеке тұрғын үй секторында 49 жастағы азамат ұсталды, - деп хабарлайды Aqshamnews.kz.
Күдіктіге жүргізілген жеке тінту барысында ұнтақ тәрізді зат салынған орамалар табылды. Сот-химиялық сараптама қорытындысына сәйкес, тәркіленген зат синтетикалық есірткі екені анықталды. Заттың жалпы салмағы 7 грамнан асады. Аталған дерек бойынша Түрксіб аудандық полиция басқармасында қылмыстық іс қозғалып, күдікті уақытша ұстау изоляторына қамалды.
– Бұл бағыттағы жұмыс жүйелі түрде жүргізіліп келеді. Біз есірткіні тарату арналары мен осы қылмыстық бизнеспен айналысатын тұлғаларды анықтау бағытында тұрақты жұмыс жүргізіп келеміз. Әсіресе, тұрғын үй секторында жедел әрекет етіп, профилактикалық шараларды күшейту аса маңызды, себебі мұндай ортада есірткі кез келген адамға қолжетімді болуы мүмкін, – деді Алматы қаласы полиция департаментінің есірткі қылмысына қарсы іс-қимыл басқармасының бастығы Мұрат Жұмабаев.
Спикердің сөзінше, есірткі қылмысына қарсы күрес полиция қызметінің басым бағыттарының бірі болып қала береді.
– Азаматтарды бейжай қалмауға шақырамыз. Күдікті әрекеттер туралы кез келген ақпарат есірткінің таралуына тосқауыл қоюға көмектеседі. Бірлескен күш-жігер арқылы біз балаларымыз бен жастарымызды осы қауіпті індеттен қорғауымыз қажет, – деп толықтырды Мұрат Жұмабаев.