Алматы қаласы бойынша ҰҚК департаменті қалалық прокуратурамен бірлесіп синтетикалық есірткі жасайтын жерасты зертханасын жойды. Бұл туралы 2024 жылы 1 маусымда ҚР ҰҚК мәлімет таратты, деп хабарлайды almaty-akshamy.kz ҚР ҰҚК баспасөз қызметіне сілтеме жасап.
Ұсылынған мәліметке сәйкес, 16 мамырда оңтүстік астананың жеке үйлерінің бірінде психотроптық заттарды дайындау процесінде Қазақстанның екі азаматы ұсталды.
«Тінту барысында 7 келі «мефедрон» психотроптық заты және 200 литр прекурсорлар, сондай-ақ есірткі құралдарын дайындауға арналған жабдықтар алынды. Табылған есірткінің құны «қара» нарықта шамамен 140 млн теңгені құрауы мүмкін», делінген хабарламада.
Сурет: ҚР ҰҚК баспасөз қызметі
Тергеу мәліметтері бойынша, ұсталған адамдар шетелдік интернет-дүкендердің бірінің мүддесі үшін «варщиктер» деп аталатындар ретінде жұмыс істеген.
«Соттың санкциясымен оларға қамауда ұстау түріндегі бұлтартпау шарасы таңдалды. ҚР Қылмыстық Кодексінің 297-бабының 3-бөлігі бойынша сотқа дейінгі тергеп-тексеру жүргізілуде», - деп мәлімдеді ҚР ҰҚК баспасөз қызметі
ҚР Қылмыстық-процестік кодекстің 201-бабы 1-бөлігіне сәйкес өзге ақпарат жария етуге жатпайды.