Алматыда еріктілерді цифрлық есепке алу жағы қолға алынады

2026 жылы Алматы жастарды еріктілік қызметке тартудың осы заманғы цифрлық тәсілдеріне де жүгіне бастайды. Яғни, геймификация элементтері қолданысқа еніп, еріктілер цифрлық есепке алынады. Өңірлік коммуникациялар қызметінде Жастар саясаты басқармасының басшысы Азиз Кажденбек осылай деді. 

Спикердің айтуынша, еріктілер инфрақұрылымын дамыту мен замандық цифрлық шешімдерді енгізуге ерекше көңіл бөлінгелі отыр. Қазіргі таңда Алматы еріктілер фронт-кеңсесі 58 мыңнан астам еріктінің басын қосып отыр, 2025 жылдың өзінде 2 мыңнан астам қалалық іс-шараға қолдау көрсеткен. Бұл еріктілер қозғалысының ауқымы үлкен екеніне дәлел.

«Біздің басты міндетіміз – еріктілікті бір реттік акция қылмай, жастарды дамытатын, оларды қала өміріне кіріктіретін бастамаға айналдыру», – дейді.

Атап айтқанда, қалада волонтерліктің цифрлық моделі енгізіледі. Оған қатысатын әр адамның мәртебесі, жеке статистикасы, миссиялары мен жетістіктері көрсетілетін еріктілердің цифрлық паспорты қалыптасады. Сонымен қатар Volu-Coins атты ынталандыратын валюта енгізу де жоспарланып отыр. Бұл валютаны жабық іс-шараларға қатысып, бренд өнімдер алып, қоғамға белілі адамдармен кездескенде пайдалануға болады.

Үздік еріктілер қалалық рейтингтерге енгізіліп, стратегиялық жобаларға қатысады. Арнаулы визуалды цифрлық карта еріктілердің жұмысы мен бастамаларға қатысуды көрнекі түрде бақылауға мүмкіндік береді.

2026 жылы Алматыда «Almaty Volunteers 2026» лендингін іске қосып, жастар алаңдарында қалдықтарды сұрыптау пункттерін ашу, Еріктілер академиясының жұмысы, жазғы көшбасшылық лагерь өткізу мен Volunteer Skills Map цифрлық картасын енгізу де межеленген. Еріктілер орталығының бірыңғай жұмыс стандартын әзірлеп, верификация тетіктерін енгізіп, ерікті мәртебесін дамыту бойынша ұсыныс та әзірленіп жатыр.