Алматы мемлекеттік зообағында діни экстремизмнің алдын алу және қызметкерлердің діни сауаттылығын арттыру мақсатында арнайы ақпараттық дәріс ұйымдастырылды.
Бұл шара қызметкерлердің құқықтық және мәдени танымын кеңейтіп, ақпараттық қауіпсіздікті нығайтуға бағытталды, деп хабарлайды aqshamnew.kz.
Ақпараттық дәрісті әл-Фараби атындағы Қазақ ұлттық университетінің аға оқытушысы, дінтану мамандығы бойынша докторант Тұңғатова Ұлжан жүргізді. Ол өз сөзінде Қазақстан аумағында тарихи қалыптасқан дәстүрлі діндердің ерекшеліктері мен қоғамдағы маңызына жан-жақты тоқталды. Сонымен қатар, діни таным мен ақпараттық қауіпсіздік арасындағы өзара байланыстың өзектілігін ашып көрсетті.
Ұлжан Тұңғатова заманауи қоғамда діни сауаттылықтың рөлі артып келе жатқанын атап өтіп, әсіресе әлеуметтік желілер мен онлайн кеңістікте таралатын радикалды мазмұндардан сақ болудың маңызын ерекше атады. Ол қатысушыларға ақпараттың қайнар көзін тексеру, діни мәселелер бойынша ресми әрі сенімді дереккөздерді пайдалану қажеттігін ескертті.
Іс-шара аясында қатысушылар дін саласына қатысты өздерін толғандырған сұрақтарын қойып, маманмен еркін пікір алмасу мүмкіндігіне ие болды. Қызметкерлер діни ағымдар арасындағы айырмашылық, дәстүрлі дін мен радикалды идеологияның белгілері, сондай-ақ дін мен зайырлы қоғамның үйлесімділігі туралы нақты әрі түсінікті жауаптар алды.
Бұл дәріс тек ақпарат беру мақсатында ғана емес, сонымен қатар қызметкерлердің діни және құқықтық мәдениетін жетілдіруге бағытталды. Мұндай кездесулер жұмыс ұжымындағы сенімділік пен тұрақтылықты арттырып, кәсіби ортада толерантты көзқарас қалыптастыруға ықпал етеді.
Дәріс соңында зообақ қызметкерлері шараның мазмұны мен ұйымдастырылу деңгейіне оң баға беріп, мұндай іс-шаралардың тек кәсіби емес, тұлғалық даму үшін де маңызды екенін атап өтті. Қатысушылар діни сауаттылықтың тек жеке өмірде емес, кәсіби ортада да маңызға ие екенін сезінгендерін жеткізді.
Алматы мемлекеттік зообағында өткен бұл ақпараттық дәріс — діни экстремизмге қарсы күрестегі маңызды профилактикалық қадамдардың бірі. Қызметкерлердің құқықтық және мәдени сауаттылығын арттырып, радикалды идеологияларға қарсы ақпараттық иммунитет қалыптастыру – қоғамның қауіпсіздігіне қосылған сүбелі үлес. Мұндай іс-шаралар қоғамдық мекемелерде тұрақтылық пен сенімділік атмосферасын қалыптастыруда шешуші рөл атқарады.