Алматыда дәрігерлер салмағы шамамен 25 келі болатын алып ісікті сәтті алып тастап, науқастың өмірін сақтап қалды. Мамандар бұл жағдай дер кезінде тексерілудің және дәлелсіз ем-домға сенбеудің қаншалықты маңызды екенін тағы бір рет көрсетті, – деп хабарлайды aqshamnews.kz тілшісі.
Денсаулық сақтау министрлігінің мәліметінше, 1957 жылы туған әйел адамның құрсақ қуысында бірнеше ай бойы көлемі ұлғайып келген ісік анықталған. Оның салмағы шамамен 25 келіге жеткен.
Науқас осы уақытқа дейін дәстүрлі емес ем түрлеріне жүгініп, биологиялық белсенді қоспалар қабылдаған. Алайда соған қарамастан ісік өсе берген. Туыстарының айтуынша, әйел өз жағдайын жасырып келген, тіпті ББҚ сатып алу үшін несие де рәсімдеген.
Кейін ол Алматы онкологиялық орталығына жүгініп, онкохирургия бөлімшесінің меңгерушісі Нұрлан Балтаевтың қарауына түскен. Компьютерлік томография нәтижесінде құрсақ қуысы мен кіші жамбаста көлемі 55×35 сантиметр болатын алып түзіліс бары анықталған. Дәрігерлердің айтуынша, ісік іс жүзінде бүкіл құрсақ қуысын алып жатқан.
Ота шамамен 2–2,5 сағатқа созылған. Күрделі хирургиялық араласу барысында ісік құрсақ қуысының артқы кеңістігінен алынып тасталған. Операцияны Нұрлан Балтаев пен оның ассистенті Ғалым Сармаш жүргізген.
Алынған ісіктің салмағы 25 келіге жуық болған. Гистологиялық зерттеу қорытындысы бойынша науқастан некроз ошақтары бар құрсақ қуысы артындағы дедефференцияланған липосаркома анықталған. Бұл дерттің қатерлі ісік екенін растаған.
Қазіргі уақытта науқас химиотерапия курсынан өтіп жатыр және мамандардың тұрақты бақылауында.
Дәрігерлер бұл жағдай дәрігерге қаралуды кешіктіру мен дәлелі жоқ ем тәсілдеріне сенудің қаншалықты қауіпті екенін айқын көрсететінін айтады. Мамандар онкологиялық аурулармен күресте уақытылы диагностика шешуші рөл атқаратынын ескертті.