Алматының өңірлік коммуникациялар қызметінде өткен баспасөз конференциясында «Даму» кәсіпкерлікті дамыту Қоры филиалының директоры Жандос Нұрғазинов жұмыс қорытындылары мен мегаполис кәсіпкерлері үшін жаңа қолдау шаралары жайында айтып өтті, деп хабарлайды aqshamnews.kz.
Оның айтуынша, қызмет басталғаннан бері қор жалпы сомасы 2,2 трлн теңгеге 20,4 мыңнан астам жобаға қолдау көрсетті, оның 85% - ы микро және шағын бизнеске тиесілі.
«Қор қолдаған кәсіпорындар бүкіл кезең ішінде 16 619,9 млрд теңгеге өнім өндіріп, ал төленген салық көлемі 1 242,5 млрд теңгені құрады. 140 мыңнан астам жұмыс орны сақталып, жаңадан ашылды. Осылайша, салынған әрбір 1 теңге 5 теңге мөлшерінде салық ретінде қайтарылады», – деп атап өтті Ж. Нұрғазинов.
Қала әкімдігімен бірлесіп іске асырылатын «Almaty Business/Jana Business» бағдарламасына ерекше назар аударылды. Бағдарлама аясында ШОБ өкілдеріне жылдық 7% мөлшерлемемен, 7 жылға дейінгі мерзімге және 100 млн теңгеге дейінгі сомаға несие беру ұсынылады. 2015 жылдан бастап бағдарламаға 32,5 млрд теңге бағытталды, ал ағымдағы жылы тағы 3 млрд теңге бөлу жоспарлануда.
Бағдарлама аясында 852 кәсіпкерге қолдау көрсетіліп, жалпы сомасы 124,9 млрд теңгеге несие берілді. Соның нәтижесінде 1 214 млрд теңгенің өнімі өндіріліп, бюджетке 100,7 млрд теңге салық түсті.
Нұрғазинов кәсіпкерлермен «Даму» қорынан қолдау алу туралы кеңестерімен бөлісті.
«Қор шағын және орта кәсіпкерлік субъектілерін қолдауға бағытталған бірқатар құралдарды ұсынады. Олардың қатарында басым бағыттар бойынша 200 млн теңгеге дейінгі несиелерге пайыздық мөлшерлемені субсидиялау, кепілдік беру, жеңілдетілген несиелеу және жобалардың тиімділігін бақылау бар. Қолдау алу үшін кәсіпкер банкке өтінім тапсырып, мақұлдаудан өтіп, қажетті құжаттарды «Даму» қорына ұсынады. Кейін банкпен және қор өкілдерімен үшжақты келісімшартқа қол қойылады», – деп түйіндеді ол.