Алматының референдум учаскелерінде адамдардың қарасы көп. Дауыс беруге келген азаматтардың арасында әлеуметтік желіде мыңдаған оқырманы бар танымал блогерлер мен тиктокерлер бар, деп хабарлайды aqshamnews.kz.
Мегаполистегі №101 референдум учаскесінде актер әрі блогер Еламан Есентаев дауыс берді. Ол ел болашағы үшін маңызды мәселеде әр азаматтың дауысы маңызды екенін айтты.
- Референдум – халықтың сенімін арттыруға және АЭС салу туралы шешімнің әділ әрі ашық қабылдануын қамтамасыз етуге мүмкіндік береді. АЭС мәселесіне қатысты референдум өткізу – халықтың даусына құлақ асу үшін жасалған дұрыс қадам. Мұндай шешімдер қабылдауда тек үкімет емес, ел азаматтарының да көзқарасы ескерілуі тиіс деп санаймын. Әрбір азаматтың пікірі маңызды, әрбір дауыс елдің болашағына ықпал ететін шешімдерге әсер етеді, - деді ол.
Ал қазақ тілінде сабақ беретін қоғам белсендісі, блогер Алина Кан референдум учаскелеріндегі ашықтық пен әділдікті баса айтып өтті.
- Референдум адал өтіп жатыр. Қаншама азаматтар мен азаматшалар әлі де дауыс беруге келІп жатыр. Бүгін еліміздің болашағы анықталуда. Халық дұрыс жақты тандады деген ойдамын, - деді Алина Кан.
Алматының №621 референдум учаскесінде алғашқылардың бірі болып дауыс беруге барған блогер Диана Тоқтар бұл оның азаматтық парызы екенін айтты. Ал «Jas Live» жобасының жетекшісі, актер, блогер Мейіржан Келемеденов референдумға қатысу арқылы, ел болашағына үлес қосқанын атап өтті. Ол қаладағы №108 учаскеде өз таңдауын жасады.
- Бүгін референдумға қатысып, өз дауысымды бердім. Бұл маңызды қадам, өйткені еліміздің болашағына өз үлесімді қосқым келді. Әсіресе, АЭС құрылысы секілді маңызды мәселе талқыланып жатқанда, еліміздің болашағына бей-жәй қарамай қатысуым азаматтық борышым деп білемін. Бұл шешім келешек ұрпақ үшін қажет деп санаймын, - деді Мейіржан Келемеденов.
Алматыда дауыс берген блогер- тиктокерлердің қатарында Бекзат Сұлтан мен Дамир Мұташов бар. Бекзат Сұлтан референдум арқылы халықтың саяси мәдениеті қалыптасып жатқанын айтса, екіншісі бұл науқан әр адамға өз ойын білдіруге мүмкіндік бергенін мәлімдеді.
«Қазақстан КВН одағының» Алматы филиалының директоры, блогер Оңдасын Құлымбетов та бүгінгі референдум туралы өз ойын білдірді.
- Меніңше, сұрақ – АЭС қажет не қажет емес деген мәселеде тұрған жоқ. Атом электр стансасының қажет екені бәрімізге белгілі. Себебі қазір әлем жасыл энергияға ұмтылып жатыр. Бүгінгі басты мәселе – қауіпсіздігі. Сондықтан бүгін белсенді азамат ретінде дауыс беріп, кейін оң шешім шықса, оның қауіпсіздігіне байланысты сұрақтарды қоғам болып қадағалау керек деп ойлаймын, - деп атап өтті ол.