Алматының бірқатар көшелерінде көлік қозғалысын ұйымдастырудың жаңа тәртібі енгізілді, – деп хабарлайды aqshamnews.kz тілшісі.
Қала әкімдігінің мәліметінше, 18 маусымнан бастап Медеу ауданында Достық даңғылының Гоголь көшесінен Жібек жолы даңғылына дейінгі бөлігінде қозғалыс солтүстік бағытта біржақты болды. Сондай-ақ Зенков көшесінің Мақатаев көшесінен Гоголь көшесіне дейінгі аралығында көліктер тек оңтүстік бағытта жүретін болады.
Бұдан бөлек, Әуезов ауданындағы Атамекен шағынауданында орналасқан Атамекен көшесінің №103 үйден №108 үйге дейінгі бөлігінде де оңтүстік бағытта біржақты қозғалыс ұйымдастырылған.
Қалалық Жол қозғалысын ұйымдастыру және жолаушылар тасымалы басқармасының түсіндіруінше, бұл шешім Алматы қалалық полиция департаментінің әкімшілік полиция басқармасымен бірлесіп қабылданған. Негізгі мақсат – көлік жүктемесін азайту, жолдардың өткізу қабілетін арттыру және жолдағы қауіпті жағдайлардың алдын алу.
Мамандар өзгерістерді енгізу кезінде қазіргі көлік ахуалы мен тұрғындардың ұсыныс-пікірлері ескерілгенін атап өтті.
Әзірге жаңа қозғалыс сызбасы пилоттық режимде жұмыс істейді. Оның тиімділігіне жүргізілетін мониторинг қорытындысы бойынша алдағы шешімдер қабылданады.