Алматы қаласы Алатау ауданындағы №156 жалпы білім беретін мектепте "Бірінші сынып оқушыларын жаяу жүргіншілер қатарына қабылдау" атты тәрбиелік іс-шара өтті.
Шараның мақсаты – бастауыш сынып оқушыларына жолда өзін-өзі қауіпсіз ұстау дағдыларын дарытып, жол қозғалысы ережелерін сақтау мәдениетін қалыптастыру, - деп хабарлайды Aqshamnews.kz.
Бағдарлама аясында балаларға арналған жол жүру ережелеріне қатысты интерактивті сабақтар ұйымдастырылып, білімдерін бекітуге арналған тәжірибелік тапсырмалар орындалды. Сонымен қатар оқушылар жол полициясы қызметкерлерімен кездесіп, салтанатты түрде "Жас жаяу жүргінші" антын қабылдады.
- Балалардың жолдағы қауіпсіз жүріс-тұрыс дағдыларын қалыптастыру – жол-көлік оқиғаларының алдын алудағы аса маңызды бағыт. Біз әрбір баланың мектеп табалдырығын аттаған сәттен бастап жол ережелерін түсініп, оны құрметтей білуін қалаймыз. Мұндай іс-шаралар балалардың өз қауіпсіздігіне және айналасындағы адамдардың амандығына деген жауапкершілік сезімін тәрбиелеуге ықпал етеді, – деді Алматы қаласы ПД жергілікті полиция қызметі басқармасының бастығы Серік Шумаев.
Алматы қаласы полиция департаменті мұндай бастамалардың "Профилактика" жылы аясында жүзеге асып жатқанын және балалар арасындағы жол-көлік жарақаттарын азайтуға бағытталған кешенді жұмыстың бір бөлігі екенін атап өтті.