Алматыда мектептердің жаңа оқу жылына даярлығы аяқталып қалды. Әсіресе бірінші сынып оқушыларын қабылдауға, оларды оқулықпен қамтып, бастауыштағыларға тегін тамақтандыру жағын ұйымдастыруға көп көңіл бөлініп жатыр. Қалалық Білім басқармасының мәліметінше, 2025 жылғы 20 тамызда бірінші сыныпқа 26 991 бала қабылданған. Олардың 57%-ы оқуын қазақ тілінде, 42%-ы орыс тілінде бастамақ.
«Біздің басты мақсатымыз – әр баланың оқу жылын толық даярлықпен бастап, оқулықпен, тамақпен, қажет болған жағдайда қолдау көруіне көңіл бөлу. Бұларды мектептермен, ата-аналармен бірлесе отырып уақтылы ісе асырып жатырмыз», - деді Алматы қаласының Білім басқармасының басшысы Сайран Сайфеденов брифинг кезінде.
Жаңа оқу жылында 1–4 сынып оқушыларын тегін тамақтандыруға 16,8 млрд теңге бөлінді. Яғни, бұл 127 мыңнан астам бала тегін ыстық тамақпен қамтылады деген сөз. Әлеуметтік қолдау көрсету жағы да ұмыт қалған жоқ. «Мектепке жол» республикалық акциясы аясында «Всеобуч» қоры 13 мың балаға мектеп формасын сатып алуға 715 млн теңге, әлеуметтік осал отбасыдан шыққан 10 мыңнан астам оқушыны тамақтандыруға 1,4 млрд теңге бөлді. Оның 74%-ын ата-аналардың банк картасына аударып үлгерді.
Оқулықпен қамту да ерекше бақылауға алынған. 2025–2026 оқу жылына Алматы қаласы 3,3 млрд теңгеге 884 мыңнан астам оқулық сатып алып жатыр. Барлық баспамен, жеткізушілермен келісімшарттар жасалып қойған, бұл осы кітаптарды мектептерге дер кезінде жеткізуге мүмкіндік бермек.