Алматыда Мемлекеттік шығармашылық және спорттық тапсырыс аясында балаларды тегін үйірмелер мен спорт секцияларына қабылдау үшін ата-аналардан өтініштер қабылдау басталды.
Жүйеге жүктемені азайту мақсатында жазба қаланың аудандары бойынша кезең-кезеңімен ашылады:
- 30 қыркүйек, 11:00 – Әуезов ауданы;
- 30 қыркүйек, 18:00 – Медеу ауданы;
- 1 қазан, 11:00 – Жетісу ауданы;
- 1 қазан, 15:00 – Алатау ауданы;
- 2 қазан, 15:00 – Түрксіб ауданы.
Ұйымдастырушылар орын саны шектеулі екенін және ол бөлінген бюджет көлеміне сәйкес айқындалатынын атап өтті.
Ата-аналарға жазылу ережелерімен мұқият танысу, жүйені өз бетінше пайдалану және электрондық цифрлық қолтаңба (ЭЦҚ) мен жеке кабинетке кіруді үшінші тұлғаларға бермеу қатаң ескертіледі. Ережелерді бұзған жағдайда заңнамаға сәйкес жауапкершілік қарастырылған.
Құзырлы органдар полиция департаментімен бірлесіп, рәсімнің ашықтығы мен заңдылығын қамтамасыз етуге бағытталған алдын алу шараларын жүргізуде.
Қаланың басқа аудандары бойынша жазылу мерзімі туралы ақпарат қосымша хабарланады.