Алматыда балалардағы қызылшаның ең жиі кездесетін түрін айтты, – деп хабарлайды aqshamnews.kz тілшісі.
Қызылша – ең жұқпалы вирустық инфекцияннң бірі болып қала береді, әсіресе вакцина алмаған балалар мен сәбилерде ол асқынып кетуі мүмкін.
Өңірлік коммуникациялар қызметінде өткен брифинг барысында Қалалық балалар клиникалық инфекциялық ауруханасының орынбасары Қарлығаш Әбдірахманова атап өткендей, балалардағы қызылшаның ең жиі кездесетін түрі – пневмония мен бронхит екен. Айтуынша, тыныс алу жүйесінің зақымдануы науқасқа ауыр тиіп, ондай адам ем алып, тұрақты түрде медициналық бақылауда болуы қажет.
Маман қызылшаның жоғары температурамен, айқын интоксикациямен және тән бөртпесімен ғана қауіпті емес екенін атап өтті.
Инфекция өкпе қабынуына, ортаңғы құлақ қабынуына, көмейдің зақымдануына, кей кезде орталық жүйке жүйесінің зақымдануына, соның ішінде энцефалиттің дамуына әкелуі мүмкін.
Сонымен қатар, қызылшадан кейін баланың иммундық жүйесі уақытша әлсіреп, организмді аурушаң етеді.
«Қызылша – жай ғана бала ауруы емес. Асқынуы ауыр болуы мүмкін оның, әсіресе вакцина алмаған балаларға қауіпті. Алдын алудың жалғыз сенімді жолы – вакцинация», – дейді Қарлығаш Әбдірахманова.
Жоғары температура, бөртпе, жөтел пайда болып, жағдайыңыз нашарласа, медициналық көмекке уақытында жүгіну қажет екенін ескертеді дәрігерлер.