Алматыда жол апатын болдырмай, қоғамдық көлік пен жолаушыларды аман алып қалған жүргізуші марапатталды, деп хабарлайды Almaty-akshamy.kz Inform.kz-ке сілтеме жасап.
Оқиға 10 қазан күні сағат 10:30 шамасында болған.
«Қаскелең автобус паркі» ЖШС мәліметінше, сол күні Райымбек даңғылы мен Саин көшесінің қиылысындағы көпір үстінде шығыс бағытта келе жатқан 23 автобустың тежегішінің жұмысы қиындаған.
«Автобус таңертең толық техникалық тексеруден өткен соң рейске шыққан. Оқиға рейстің екінші айналымында болған. Жүргізуші Дамир Ұзақовтың тәжірибесі мен дер кезіндегі әрекеті арқасында оқиға кезінде зардап шеккендер болған жоқ. Автобус техникалық жұмыс жүргізу үшін автопаркке жеткізілді. Сондай-ақ, мұндай жағдайды қайта болдырмас үшін парктің барлық автобусына тексеріс жүргізілді»,- деп хабарлады Алматы қалалық мобильділік басқармасы.
Айта кетейік, жүргізуші Дамир Ұзақовты басшылығы грамотамен марапаттап, бір айдың қорытындысы бойынша сыйақы берді.
Сондай-ақ, желі қолданушысы оқиғаның қалай болғаны туралы видео түсірді.