Алматы қаласының Достық үйінде “Бірлік пен келісім жолындағы 30 жыл” атты Қазақстан халқы Ассамблеясының құрылғанына 30 жыл толуына орай мемориалдық тақта орнатылды.
Оның ашылуы салтанатына Алматы әкімінің орынбасары Азамат Қалдыбеков және Қазақстан халқы Ассамблеясының мүшелері қатысты, деп хабарлайды aqshamnews.kz
Іс-шара барысында Азамат Қалдыбеков Мемлекет басшысы Қасым-Жомарт Тоқаевтың құттықтау сөзін оқыды. Сондай-ақ Алматы әкімдігінің атынан жиналған қауымды мерейлі күнмен құттықтады.
"1 наурыз - Алғыс айту күні әрі Қазақстан халқы Ассамблеясының 30 жылдығын атап өтетін күн. Бұл ұйым еліміздегі бейбітшілік пен келісімнің бірегей институтына айналды. Ассамблея қоғамымыздың бірлігі мен нышанына, Қазақстанның өркендеуі мен тұрақтылығының басты іргетасына айналды", - деп атап өтті Алматы әкімінің орынбасары.
Сонымен қатар іс-шара барысында Қазақстан халқы Ассамблеясының ақсақалдары шаһар басшысының атынан алғыс хаттармен марапатталды.
Айта кетейік, 1995 жылы 1 наурыз күні Қазақстан халқы Ассамблеясының негізі қаланған болатын.