Өңірлік коммуникациялар қызметінде өткен брифингте қалалық Қорғаныс істері жөніндегі департаменттің бастығы, полковник Жақсылық Айтбаев әскерге шақыру науқаны кезіндегі заңнаманы сақтау мәселесіне байланысты қойған алматылық журналистердің сұрағына жауап берді, – деп хабарлайды aqshamnews.kz тілшісі.
Оның айтуынша, қолданыстағы заңнама шақырылушыларға да, жұмыс берушілерге де бірдей жауапкершілік жүктейді, сондай-ақ әскери қызметке қатысты мәселелерді «бейресми» жолмен шешуге толық тыйым салынған.
Спикер әскерге баруды кейінге қалдырып немесе «ақ билет» алып беруді ұсынатын әскери комиссариаттағы «көмекшілер» туралы да айтып өтті.
«Әскери қызметті кейінге қалдыруды, міндетінен босатуды заң бойынша шақыру комиссиясы ғана шешеді. Оған делдал керек емес. Жалған дәрігерлік анықтама алып, ауру деген диагноз қойып, әскери қызметтен жалтарудың басқа да заңсыз жолын ойлап табу делдалға да, әскерге шақырылған адамға да қылмыстық жауапкершілік жүктейді», – дейді Жақсылық Айтбаев.
Әскерге барудан жалтарғандардың жауапқа тартылатынын еске салды.
«Заңды негізі болмаған жағдайда әскерге шақырудан жалтару айыппұл арқалап, еңбекпен түзеу жұмысына не бір жылға дейін бас бостандығын шектеуге немесе айыруға әкеп соғады. Жазасын ауырлатар басқа да себеп болған жағдайда жаза жағы одан да қатаң болуы мүмкін», – дейді спикер.
Жұмыс берушілер үшін де жауапкершілік қарастырылған. Ұйым басшылары әскери есепте тұратын және әскерге шақырылатын қызметкерлер туралы мәліметті дер кезінде ұсынуға міндетті.
«Мұндай деректі әскери органдарға уақытылы немесе мүлдем ұсынбаса 10-нан 40 айлық есептік көрсеткішке дейін айыппұл салады», – деп толықтырды.
Қорытындылай келе, Қорғаныс істері жөніндегі департаментте әскерге шақыруға қатысты барлық мәселе заңмен белгіленген тәртіпте, оның ішінде электрондық үкімет порталы арқылы шешілетінін атап өтіп, азаматтарды заңның талаптарын сақтап, күмәнді схемаларға қатыспауға шақырды.