2026 жылғы 17 сәуірде Алматы қаласында Қазақстан Республикасы Қорғаныс министрлігінің Спорт комитеті - Орталық спорт клубы армиясы базасында әскери қызметшілер арасында қазақ күресінен «Әскер барысы - 2026» республикалық іріктеу турнирі өтті, – деп хабарлайды aqshamnews.kz тілшісі.
Аталған жарысқа еліміздің күштік құрылымдарын таныстыратын командалар қатысты. Олардың қатарында Қазақстан Республикасы Қарулы Күштері, Ішкі істер министрлігі, Төтенше жағдайлар министрлігі, Ұлттық ұлан, Мемлекеттік күзет қызметі және Шекара қызметі бар. Турнирге 10 команда, 20-ға жуық балуан қатысып, өзара бақ сынады.
Жарысқа абсолюттік салмақ дәрежесінде, яғни 90 келіден жоғары балуандар қатысты. Балуандар жоғары дайындық деңгейін, күш-қайрат пен төзімділікті, сондай-ақ жеңіске деген жігерін көрсетті.
Турнирдің басты мақсаты – әскери қызметшілер арасында қазақ күресін кеңінен насихаттау, олардың дене дайындығын арттыру, жауынгерлік рухын нығайту және әскери-қолданбалы спорт түрлерін дамыту.
Тартысты белдесулер нәтижесінде жеңімпаз бен жүлделі екінші орын иегері анықталып, олар күзде өтетін «Қазақстан барысы» республикалық турниріне жолдама алды. Аталған додада олар өз ведомстволарының намысын ел деңгейінде қорғамақ.