Алматы қалалық кардиологиялық орталығында митралды жеткіліксіздікті емдеуге арналған заманауи аз инвазивті MitraClip жүйесін имплантациялау бойынша шебердің сабағы өтті, – деп хабарлайды aqshamnews.kz тілшісі.
Іс-шара аясында интервенциялық кардиологтар көрсетілімдік оталар жасап, жүректің құрылымдық ауруларын транскатетерлік әдістермен емдеу тәжірибесімен алмасты.
Кездесу барысында мамандар жүрек патологияларын эндоваскулярлық емдеудің заманауи тәсілдерін талқылады. Атап айтқанда, жүрек қақпақшаларын транскатетерлік емдеу әдістері қарастырылды. Бұл тәсілдер күрделі ауруларды ашық ота жасамай емдеуге мүмкіндік береді.
MitraClip технологиясына ерекше назар аударылды. Бұл митралды қақпақшаны транскатетерлік қалпына келтіру әдісі (TEER). Процедура катетерді қан тамырлары арқылы енгізу жолымен жүзеге асырылады және хирургиялық тәуекелі жоғары науқастарда митралды жеткіліксіздікті азайтуға мүмкіндік береді.
Шебердің сабағының негізгі бөлігі екі көрсетілімдік ота болды.
Науқастар:
• 78 жастағы ер адам — митралды қақпақша хордасының үзілуі диагнозы бар;
• 63 жастағы ер адам — митралды жеткіліксіздік диагнозы бар.
Оталар шақырылған сарапшылардың қатысуымен өтті. Прокторлар ретінде Астана қаласындағы UMC «Интервенциялық кардиология» клиникалық-академиялық департаментінің жетекшісі, медицина ғылымдарының докторы Марат Әріпов және функционалдық диагностика дәрігері Ақнұр Қали қатысты.
«Мұндай оқыту форматындағы іс-шаралар қазақстандық кардиология тәжірибесіне озық технология енгізуге, дәрігерлердің біліктілігін арттыруға және ауыр жүрек аурулары бар науқастарға жоғары технологиялық медициналық көмек көрсету мүмкіндігін кеңейтуге жол ашады», — деді ҚКО интервенциялық кардиология бөлімшесінің меңгерушісі Оразбек Сахов.
Аталған шебердің сабағы интервенциялық кардиологияның дамуына серпін беріп, Алматыдағы кардиологиялық қызметтің жоғары деңгейін тағы бір мәрте дәлелдеді.