АҚШ, ЕО, Азия және ТМД-ның 15-ке жуық елдерінен жетекші ғалымдар мен архив ісінің сарапшы мамандары қатысады
Қазақстан Республикасы Президентінің Архиві Халықаралық архивтер кеңесінің демеуімен 2022 жылғы 19-21 қазанда Алматы қаласында «Ашық қоғамға – ашық Архив» I Халықаралық архивистер Конгресін өткізеді, деп хабарлайды Almaty-akshamy.kz.
Қазақстан әлемнің 200 елінің архившілерін біріктіретін ЮНЕСКО ұйымының құрылымы – Халықаралық архивтер кеңесі басшылығының қолдауымен және қатысуымен кәсіби архив қоғамдастығы іс-шарасын өткізетін ТМД елдеріндегі алғашқы мемлекет болды.
Іс-шараның мақсаты – тарихты сақтаушылардың кәсіби қоғамдастығының өзара іс-қимылы мен сындарлы диалогы үшін тұрақты жұмыс істейтін халықаралық келіссөз алаңын құру, тарихи-мәдени және деректі мұраны сақтаудың өзекті мәселелері бойынша ұсыныстарды, шешімдерді талқылау және қабылдау, архивті дамытудың инновациялық идеяларын қалыптастыру, жобаларды іске асыру және үздік архивтік тәжірибелерді тираждау.
Конгресс аясында мәдениет, өнер, әдебиет, ғылым және білім арқылы қоғам үшін архивтік құжаттардың рөлі мен маңызын ашатын тақырыптық алаңдар (архивтік пікірталас курстар) ұйымдастырылатын болады. Архивтік лекторийлер форматында шақырылған негізгі спикерлердің сөз сөйлеуімен кәсіби сессиялар жоспарланған және олардың қорытындысы бойынша ашық талқылаулар өтеді.
Конгреске спикерлер ретінде отандық архившілер мен зиялы қауым өкілдерімен қатар АҚШ, ЕО, Азия және ТМД-ның 15-ке жуық елдерінен жетекші ғалымдар мен архив ісінің сарапшы мамандары қатысады.
Жұмыс тілдері: қазақ, орыс, ағылшын, түрік, қытай.
2022 жылдың 19 қазаны сағат 10.00-де (Астана қ. уақытымен, GMT +6) Халықаралық архившілердің Конгресінің ресми ашылу рәсімі өтеді. Ашылу салтанатына ҚР Президенті Әкімшілігі мен ҚР Мәдениет және спорт министрлігінің өкілдері, Алматы қаласының әкімдігі, шетелдік және отандық архив мекемелерінің басшылары, дипломатиялық корпус өкілдері, мемлекет және қоғам қайраткерлері қатысады деп күтілуде.