Алматыда Халықаралық балаларды қорғау күні мерекесіне орай ерекше мазмұндағы қайырымдылық шарасы ұйымдастырылды. «Әнші балапан» және «SOSстрадание» қоғамдық қорларының бастамасымен өткен «Ақ тілекпен, балапан жүрекпен» атты акция №1 балалар үйінің онкологиялық аурулармен күресіп жүрген, ДЦП диагнозы бар балалар және «Әнші балапан» қорының балаларына арналды.
«Әнші балапан» жобасының тарихына көз жүгіртсек, ол – тек балалар байқауы ғана емес, мәдени құбылысқа айналған ірі платформа. 1990 жылдан бері мыңдаған дарынды балаларды елге таныстырып, олардың өнер жолындағы алғашқы баспалдақтарына айналды. Дильназ Ахмадиева, Мәдина Сәдуақасова, Алмас Кішкенбаев, Жанар Дұғалова сынды танымал әншілердің көпшілігі осы жобадан түлеп ұшқан.
Жоба авторы және жетекшісі Роза Жанчурина балалар шығармашылығына адал қызмет етіп келе жатқан жан. Оның көпжылдық еңбегі мен шынайы жанашырлығы арқасында «Әнші балапан» жобасы халықаралық деңгейге көтеріліп, Түркия, Франция, Германия, АҚШ сынды елдерде Қазақстан мәдениетін насихаттады.
Бағдарлама өзінің алғашқы күндерінен-ақ әлеуметтік осал топтағы балаларды қолдауға бағытталды. Ұлттық бірегейлікпен қатар көптілділікті, этникалық әралуандықты қолдап келе жатқан бұл бастама бүгінгі таңда мәдени және қоғамдық өмірдің ажырамас бөлігіне айналды.
Қайырымдылық – қоғамның рухани деңгейінің көрсеткіші. Осындай ізгі шаралар арқылы мейірім мен бірлікке негізделген қоғам қалыптасып, әрбір балаға жылулық пен сенім сыйлайды.