Алматыда «Экомед» репродуктивті денсаулық клиникасының 30 жылдығына, сондай-ақ еліміздегі қосалқы репродуктивті технологиялар мерейтойына орайластырылып, жаңа ғимарат ашылды.
Ғимараттың алдына мыңдаған қазақстандық отбасының үміті мен сенімі іспетті «Аңсаған сәби» бірегей мүсіні орнатылған. Бұл композицияда ананың жылы алақанында алаңсыз отырған бақытты балдырғанның бейнесі көрініс тапқан. Сондай-ақ аталған мүсін Мемлекет басшысының 2020 жылы, бала сүйе алмай жүрген ерлі-зайыптыларды қолдау үшін іске қосқан «Аңсаған сәби» бағдарламасымен үндес десек болады. Осы бірегей жобаның нәтижесінде жарық дүниеге 9 мыңнан астам дені сау бала келіп, талай шаңырақты қуанышқа бөледі.
Ерекше ғимараттың ашылу салтанатында «Экомед» клиникалар тобының негізін қалаушы және ғылыми директоры, биология ғылымдарының докторы, профессор Салтанат Байқошқарова сөз сөйледі.
— Менің арманым – бедеулікті түбегейлі жою. «Аңсаған сәби» мүсіні балалы болуды армандайтын барлық отбасы үшін үкілі үміттің символын білдіреді. Бүгінгі күні елімізде әрбір алтыншы жұп бедеулікке тап болып отырған кезеңде, біздің мақсатымыз – қоғамның назарын репродуктивті медицина мен заманауи технологияларды қолдау мен дамытудың маңыздылығына аудару, – деп атап өтті Салтанат Байқошқарова.
«Экомед Алматы» клиникасының жаңа ғимараты әлемдік деңгейдегі ең заманауи жабдықтармен, соның ішінде жасанды интеллект технологиясы бар Embryoscope Plus инновациялық жүйесімен және сәтті тұжырымдама мүмкіндігін айтарлықтай арттыратын Piezo ICSI бірегей жапондық әдістемесімен жабдықталған.
– Біздің клиникалар жастардың отбасын жоспарлау тақырыбына саналы түрде жақындай түсуі, осы мәселеде көзі ашық болуы және олардың өздерінің репродуктивті әлеуетін алдын ала білуі, сол арқылы өмірге дені сау жаңа ұрпақ әкелуі үшін құрылуда. Сондықтан осы клиникада Қазақстанның жаңа буыны пайда болатынына сенімдімін, – деді С.Байқошқарова.
Салтанатты іс-шараға Қапшағай қаласынан тосыннан қонақ болып келген Диана есімді әдемі бойжеткен ортаға шықты. Оның лебізі жиналғандардың бәрін толқытты.
— Менің ата-анам сегіз жыл бала сүйе алмай жүргенде, талай сынақтан өтсе де, жақсы күндерден үмітін үзбей, қол ұстасып осы “Экомед” орталығына келген екен. Нәтижесінде өмірге мен келдім. Әр туған күнімде әкем “есіңде болсын, қызым, сенің өмірге келуіңе себепші болған екінші анаң Салтанат Берденқызы” деп отыратын. Бойжеткен шағымда осы жанды іздеп, тауып, танысып, рахметімді айтқым келетін. Әлеуметтік желіден бүгінгі орталықтың ашылатынын оқып қалып, сол сәт енді туғанын сездім де, Салтанат апайдың парақшасына кіріп, жекесіне шықтым. Бірден “келе ғой, айналайын, біз сені күтеміз” деді. Міне, әкем екеуміз келіп тұрмыз. Біздің шаңыраққа нұр, маған жарық өмір, ал ата-анама толық бақыт сыйлаған Салтанат Берденқызы мен Батыр Қаратайұлына басымды иемін! — деді 23 жастағы Диана Қанатқызы.
Ал толқып тұрған әкесі қолындағы бір құшақ гүлін Салтанат Байқошқароваға ұсынды.
Осы 30 жыл ішінде ЭКО арқылы 20 000-ға жуық бала өмір есігін ашты. Иә, бүгінде «Экомед» бедеулікпен күресте үміт пен сәттіліктің символына айналды. Қазіргі күні репродуктивті медицина саласында танымал көшбасшыға айналған «Экомедтің» еліміздің 12 қаласында 14 клиникасы бар.