Алматыдағы Республика сарайында Халықаралық әйелдер күніне арналған «Әлемнің жарығы» атты салтанатты мерекелік концерт ұйымдастырылды.
Мерекелік кешке қала әкімі Дархан Сатыбалды қатысты, – деп хабарлайды aqshamnews.kz тілшісі.
Салтанатты жиынға мәдениет, білім беру, медицина, энергетика, кәсіпкерлік және қоғамдық қызмет салаларында еңбек етіп жүрген әйелдер шақырылды.
Концерттік бағдарламаны әнші Мәдина Садуақасова «Салтанат» мемлекеттік би ансамблімен бірге орындаған «Мен қазақ қыздарына қайран қалам» атты театрландырылған композициямен ашты. Сонымен қатар IL Canto тобының орындауындағы музыкалық нөмірлер мен «Жаңа ғасыр» театры актерлерінің «Әйел – шексіз әлем» атты поэтикалық қойылымы көрермен назарына ұсынылды.
Кеш барысында «Дос-Мұқасан» тобы, Роза Рымбаева, Толқын Забирова, Дияр Бабаев, Тоқтар Серіков, Бейбіт Сейдуалиева, Әбдіжаппар Әлқожа, Yernazar, Әли Оқапов, Қазыбек Құрайыш және Бағжан Октябрь сынды қазақ эстрадасының танымал өнерпаздары өнер көрсетті.
Музыкалық нөмірлер «Салтанат» мемлекеттік би ансамблінің көркем хореографиялық қойылымдарымен үйлесім тауып, кештің сәнін кіргізді. Өнерпаздар сахнада әйелдер қауымын мерекемен құттықтап, оларға амандық, бақ-береке және шабыт тіледі.
