Алматыда «Чемпиондық Рух» атты қалалық спорттық жоба өтті. Акция аясында 225 білім беру ұйымының 50 мыңнан астам оқушысы мен студенті мектептері мен колледждерінің спорт алаңдарында бір уақытта жаппай таңғы жаттығу жасады, – деп хабарлайды aqshamnews.kz тілшісі.
Бұл туралы Алматы қаласы Білім басқармасының өкілдері хабарлады.
Аталған бастама «Жастар Рухы» жастар қанаты және AMANAT партиясымен, сондай-ақ Полиция департаментінің есірткі қылмысына қарсы іс-қимыл басқармасымен бірлесіп, Спорт басқармасының қолдауымен жүзеге асырылды.
Жоба салауатты өмір салтын насихаттауға және «Заң мен тәртіп», «Таза Қазақстан» жалпыұлттық бастамаларын қолдауға бағытталған.
Іс-шараның орталық алаңы қалалық стадион болды. Мұнда оқушылар, спортшылар және түрлі ұйымдардың өкілдері жиналып, бірлескен жаттығулар мен тақырыптық іс-шараларға қатысты.
«Бұл жастармен жүргізіліп жатқан жүйелі жұмыстың бір бөлігі. Біз салауатты өмір салты мәдениетін қалыптастыруды, дұрыс құндылықтарды дәріптеуді және есірткіге қарсы тұрақты иммунитет қалыптастыруды көздейміз. Осындай бастамалар командалық рухты нығайтып, спортқа деген қызығушылықты арттырады», – деді Алматы қаласы Білім басқармасының Дене шынықтыру және спорт орталығының директоры Бақтияр Елемесов.
Мұндай жобаларды дамыту жұмыстары алдағы уақытта да жалғасып, қатысушылар саны артады.