Алматыда 2026–2027 жылғы оқу жылына бірінші сыныпқа құжат қабылдап жатыр, – деп хабарлайды aqshamnews.kz тілшісі.
Бұл туралы Өңірлік коммуникациялар қызметінде өткен брифингте Алматы қаласы Білім басқармасының басшысы Сәкен Аралбаев мәлімдеді. Оның айтуынша, жаңа оқу жылында қала мектептеріне шамамен 31 мың бірінші сынып оқушысын қабылдау жоспарланып отыр екен.
«Қаланың 214 мемлекеттік мектебінде бірінші сыныпқа қабылдайды. 10 маусымда басталған қабылдау науқаны Қазақстан Республикасының қолданыстағы заңнамасына сай жүргізіліп жатыр», – дейді спикер.
Құжат тапсыруға электрондық үкіметтің egov.kz порталын пайдаланады. Ата-аналар мектептің өзіне барып та қағаз жүзінде құжат тапсыра алады.
Бірінші сыныпқа қабылдау ата-аналардың немесе заңды өкілдердің өтініші негізінде, ешқандай қабылдау емтихандарынсыз жүзеге асады. Мектепке қабылдау кезінде сол білім беру ұйымына бекітілген аумақта тұратын балаларға басымдық беріледі.
Сондай-ақ 3:1 қағидаты қолданылады. Оған сәйкес, микроучаскеге жатпайтын бір балаға мектептің қызмет көрсету аумағында тұратын үш бала қабылданады.
«Тұрғылықты мекенжайды растау мемлекеттік ақпараттық жүйелермен интеграция арқылы автоматты түрде жүзеге асырылады. Бұл ретте баланың тұрғылықты жері бойынша тіркелуі міндетті емес, заңды өкілдерінің бірінің тіркеуде болуы жеткілікті», – деп атап өтті Сәкен Аралбаев.
Білім басқармасының мәліметінше, өткен жылғы қабылдау науқаны барысында 38 мыңнан астам өтініш қабылданып, бірінші сыныптарға 29 561 бала қабылданған. Сонымен қатар, қазақ тілінде оқытатын сыныпқа қабылданған оқушылар саны да өсіп келеді.
Мекеме өкілдері өтініштің кезегі мен білім беру ұйымдарындағы бос орындардың болуына қарай қабылдау жүргізілетінін еске салды.