Алматыда ауа райының қолайлы болуына байланысты жолдарды ағымдағы (шұңқырлы) жөндеу жұмыстары басталды. Жол инфрақұрылымын дамыту басқармасы өкілдерінің мәліметінше, қазір 22 мың шаршы метрден аса жол төсемі ағымдағы жөндеумен қамтылып отыр, – деп хабарлайды aqshamnews.kz тілшісі.
Жөндеу жұмыстары Гоголь, Төле би, Розыбакиев, Мақатаев, Наурызбай батыр, Байтұрсынұлы, Мәметова, Қонаев көшелері мен Абай, Рысқұлов, Сейфуллин, Абылай хан даңғылдарының және басқа да магистральдық көшелердің жекелеген учаскелерінде жүргізіліп жатыр. Бұл жұмыс аясында 110 люк көтеріліп, 159 люк ауыстырылды, сондай-ақ 281 жаңбыр суына арналған науа жаңартылды.
Қазір Зенков және Жетісу көшелерінің жекелеген учаскелерінде орташа жөндеу жұмыстары жүргізіліп жатыр. Жалпы, орташа жөндеумен ұзындығы 290 шақырым болатын 360 көшені, оның ішінде 17 магистральдық көшені қамту жоспарланған. Сонымен қатар, Наурызбай және Алатау аудандарында жол құрылысы басталды. Жоспар бойынша 68 шақырым жол төсемі салынады.