Алматыда былтыр 17 мыңнан астам кәсіпкердің құқығы қорғалып, қалпына келтірілген қаржы көлемі 4,9 млрд теңгеден асып түсті. Өңірлік коммуникациялар қызметінде Алматыдағы Кәсіпкерлер палатасының кәсіпкерлердің құқықтарын қорғау мен әкімшілік кедергілерді азайту бөлімінің басшысы Еркебұлан Бейімбет осылай деді. Жұмыс негізінен заңбұзушылықты жойып, бизнеске әкімшілік қысымды төмендетуді көздеген, – деп хабарлайды aqshamnews.kz тілшісі.
Оның айтуынша, бір жыл ішінде Кеңестің 14 отырысы өтіп, онда 33 мәселе қаралып, оның 21-і шешімін тауыпты. Бұл былтырғыдан 40%-ға артық. 109 заңсыз нұсқама мен 264 профилактикалық бақылау нәтижесі жойылып, 80 лауазымды тұлға жауапқа тартылған. Сотта 6 іс қаралып, 48 млн теңге сомасында 8 кәсіпкердің құқығы қорғалып, 4 әкімшілік іс тоқтатылған екен.
«Біз барлық негізгі көрсеткіш бойынша оң өзгеріс байқап отырмыз. Қорғалған құқықтың саны да артып, қайтқан қаражаттың көлемі де ұлғайып барады. Бұл кәсіпкерлердің өз мүддесін батылырақ қорғай бастағанының белгісі. Біздің міндет — оларды қолдауды күшейтіп, жүйелі өзгеріске қол жеткізу», — деп атап өтті Еркебұлан Бейімбет баспасөз конференциясында.
Биылғы бірінші тоқсанда Кеңестің 5 отырысы өтіп, 13 мәселе қаралса, оның 8-і шешілген. Осы кезеңде 2049 кәсіпкердің құқығы 1,3 млрд теңгеден астам сомаға қорғалды, 571 заңсыз өкімнің күші жойылып, 4 лауазымды тұлға жауапкершілікке тартылды.
«Біз салық органдарының әрекетіне байланысты өтініштерге ерекше назар аударамыз. Құжатты негізсіз талап етіп, шотты бұғаттап, заң бұзбаса да хабарлама жіберген бірнеше дерек анықталды. Мұндай әрекет бизнестің аяғына тұсау болады. Осындай әр іске құқықтық баға беріп, кәсіпкердің құқығын қалпына келтіруге қол жеткіземіз», — деп толықтырды спикер.
Палатаның жұмысында бірнеше кейс қаралды. Олар салық органының заңсыз хабарламасы мен талабына, кәсіпкерлерге қаражатты қайтаруға, шотты бұғаттау, мемлекеттік сатып алу кезіндегі мәселелерге, соның ішінде кепілдік жарнаның қайтарылмауы мен келісімшарт талабының сақталмауына қатысты болған. Арасында мемлекеттік гранттар бойынша келісімшарттардағы қайшылықтарға, бизнесті тексеру кезіндегі заңбұзушылыққа, сыртқы жарнама мәселесі мен қолдау шараларын бөлудегі таңдамалы тәсілге байланысты жекелеген өтініштер де болыпты.
Айта кету керек, біраз кейс бойынша нақты нәтижеге қол жетті: кәсіпкерлерге қомақты қаражат қайтарылып, заңсыз шешімнің күші жойылып, кейбір мәселе прокуратураның бақылауына алынды. Алматыда әкімшілік кедергілерді азайту мен бизнесті қорғау жұмысы жалғаса бермек.