Алматы қаласы полиция департаментінің киберқылмысқа қарсы іс-қимыл басқармасының қызметкерлері абоненттік нөмірлерді жаппай тіркеуге байланысты заңсыз әрекеттің жолын кесті.
Нөмірлер кейін алаяқтық схемаларда пайдаланылған, – деп хабарлайды aqshamnews.kz тілшісі Polisia.kz-ке сілтеме жасап.
Жедел-іздестіру іс-шаралары барысында қала тұрғыны ұсталды. Одан әртүрлі байланыс операторларына тиесілі көп мөлшердегі SIM-карталар, сондай-ақ оларды тіркеу мен іске қосуға пайдаланылған мобильді құрылғылар тәркіленді. Тергеу барысында анықталғандай, әйел адам интернет арқылы ұсынылған "қашықтан табыс табу" туралы хабарландыруға жауап берген.
Белгісіз кураторлардың нұсқауымен ол ақшалай сыйақы үшін SIM-карталар сатып алып, оларды мессенджерлерде тіркеп, растау кодтарын үшінші тұлғаларға беріп отырған. Анықталғандай, белсендірілген абоненттік нөмірлер кейін түрлі қылмыстық схемаларда, соның ішінде азаматтарға жасалған алаяқтық қоңырауларда пайдаланылған. Сот шешімімен әйел кінәлі деп танылып, үш жыл мерзімге бас бостандығынан айырылды.
– Көпшілік мұндай “жұмысты” зиянсыз деп қабылдайды, алайда іс жүзінде олар қылмысқа сыбайлас болып шығады. Әрбір берілген растау коды — азаматтарды алдаудың бір құралы, — деді Алматы қаласы ПД киберқылмысқа қарсы іс-қимыл басқармасының бастығы Әнес Қалдыбаев.