Әлеуметтік желілерде Алматы тауында қазақстандықтың жоғалып кеткені туралы хабар тарады. Бұл жағдайға қатысты қалалық ТЖД баспасөз қызметі пікір білдірді, - деп жазады Аqshamnews.kz.
Әлеуметтік желілерде не жазылды?
Threads желісінде Алан есімді жігітті іздеу туралы хабарлама жарияланды:
"Аланды іздейміз, жасы – 20, бойы – 175–180 см. 27 шілдеде таңертең Медеу жағынан Жастар шыңына (пик Молодежный) қарай тауға кеткен, содан бері байланысқа шықпады. Кейінгі рет таңертең, 27 шілдеде хабарласқан", – делінген жазбада.
Ол кезде жігіт қызыл флиска (ұзын жеңді кофта), қара шорты, қара кроссовки, қара кепка киіп жүрген. Сонымен қатар ақ-сұр рюкзагы болған. Жанында қосымша лосины, қара күртеше болуы мүмкін.
"Ол Жастар шыңына Медеу жағынан 1Б бағытымен көтерілген болуы мүмкін. Таңғы 6:00 шамасында оны біреулер Медеуде асфальт аяқталатын тұстан көрген. Мүмкін, ол Алма-Арасан жағынан (1А маршруты) немесе Медеу жағынан (1Б маршруты) түскен шығар. Кімде-кім оны көрсе немесе қандай да бір ақпарат білсе, +7 701 764 64 74 нөміріне шұғыл хабарласуыңызды сұраймыз. ТЖМ іздеу жұмыстарын бастап кетті, бірақ аумақ өте үлкен, сондықтан еріктілер – іздеуге шығуға дайын адамдар, дрон иелері мен иттері бар кинологтар өте қажет", – делінген хабарламада.
ТЖД не дейді?
Алматы қалалық ТЖД баспасөз қызметі бұл жағдайға пікір берді:
"27 шілдеде кешкі сағат 23:02-де Медеу ауданында іздестіру-құтқару жұмыстары басталды. Таңертең тауға кеткен 20 жастағы жігіттің жоғалғаны туралы хабар келіп түсті. Ол 17:00-де қайтып келуге тиіс болған. Байланыс тек тәтесі арқылы болған – геолокация қосылмаған. Ол жылы кофта, шорты мен кроссовки киіп жүрген. Бұл уақытта тауда жаңбыр мен бұршақ жауып, 4000 метр биіктікте қар түскен", – делінген хабарламада.
Іздеу жұмыстары Жастар шыңының маңында (4147 м) басталған. Оған "Медеу" постының және "Тұйық-Су" бақылау-құтқару пунктінің құтқарушылары тартылды.
"Құтқарушылар Мынжылқыға көтеріліп, Жастар шыңына қарай жаяу бағыт алған. Жастар, Титова және Т1 шыңдары тексерілді – із-түз табылмады. Мынжылқы үстіртінде ТЖД, еріктілер және дрондар қатысқан жедел штаб құрылды. "Қазавиақұтқару" тікұшағы дайын, алайда ауа райы қолайсыз – 1800 метрден жоғары бұлтты, найзағай, секундына 20 метрге дейін жел соғып тұр, бұл ұшуға кедергі", – деп мәлімдеді ведомство.
Құтқарушылардың кеңестері
Бұған дейін тәжірибелі құтқарушы Вадим Пак тауға шықпас бұрын есте сақтау керек бірнеше кеңес берген:
-
Жалғыз баруға болмайды, тіпті гидпен болсаңыз да, маршрутты алдын ала зерттеңіз;
-
Киім мен аяқкиімді ауа райы мен жер жағдайына сай таңдаңыз – алыстан көрінетін ашық түсті болсын;
-
Рюкзакта міндетті түрде жылы киім, тамақ, дәрі-дәрмек қобдишасы, фонарик, пауэрбанк және термос болу керек;
-
Жолға шығар алдында туыстарыңызға маршрутты, қайту күнін айтып, топтағы әр адамның суретін жіберіп қойыңыз.
Қосымша кеңестер сілтемеде берілген.