Алматыда Қазақстан Парламенті Сенатының депутаты Нұрия Ниязова да Конституция жобасы мен алдағы референдум туралы пікір білдірді, – деп хабарлайды aqshamnews.kz тілшісі.
Оның айтуынша, жаңа негізгі заң жобасын талқылау ел ішінде де, әлемде де маңызды өзгерістер жүріп жатқан кезеңге тұспа-тұс келіп отыр.
«Біз тарихи таңдаудың жолында тұрмыз. Конституцияның жаңа жобасын қабылдау – еліміздің дамуындағы маңызды кезең. 15 наурыз күні сайлау учаскесінде әрқайсымыз таңдау жасаймыз. Бұл Қазақстанның одан арғы дамуына атсалысу, соған болысу деген сөз», – дейді Нұрия Ниязова.
Ол сондай-ақ қазіргі әлемнің қарқынды өзгеріп жатқанын және мемлекеттер үшін жаңа үдерістер мен сын-қатерлерді де ескеру керектігін айтты.
«Әлем өзгеріп жатыр, технологиялық және цифрлық үдерістер дамып, заңнама да өзгеріп жатыр. Қазақстан ішкі берік ұстанымды сақтай отырып, сонымен бірге әлемдік аренада өз орнын нық көрсетуі керек. Конституцияның жаңа жобасы көп жағдайда осыны нығайтуға бағытталған».
Сенатордың айтуынша, бәрінің болашағы осы заңға қарап тұрғандықтан, қай жастағы адам болсын оны талқылауға белсене атсалысуы керек екен.
«Болашақтың қандай болары қай-қайсысын болсын алаңдатады. Сондықтан кез келген адам таңдау жасауы керек осындайда», – дейді Нұрия Ниязова.
