2025 жылғы 23–24 қыркүйек күндері Алматы қаласында ҚР Оқу-ағарту министрлігінің тапсырмасына сәйкес Республикалық қосымша білім беру оқу-әдістемелік орталығы ұйымдастырған «Бояулар құпиясы» республикалық жас суретшілер байқауы өтті.
Бұл байқауға еліміздің барлық облыстарынан, сондай-ақ Астана, Алматы және Шымкент қалаларынан 120-дан астам жас суретші қатысып, өздерінің шығармашылық қабілеттерін танытты.
Бірінші күн Алматы қаласындағы Қарасай ауданында орналасқан «Өрнек» лагерінде өтті. Қатысушылар осы күні конкурс тапсырмаларын орындап, шығармашылық жұмыстарын әзірледі. Балалар шеберлік сағаттарына қатысып, бір-бірімен тәжірибе алмасып, шығармашылық ортада еркін жұмыс істеу мүмкіндігіне ие болды.
Екінші күн – 24 қыркүйек – Алматы қаласы Оқушылар сарайында салтанатты түрде байқаудың жабылу рәсімі өтті. Көрме барысында жас суретшілердің үздік жұмыстары жұртшылық назарына ұсынылды. Әділқазылар алқасы қатысушылардың еңбектерін бағалап, жеңімпаздарды анықтады.
Байқау үш номинация бойынша өтті
- «Қазақстан бояулары: Менің шаңырағым – Қазақстан Республикасы»
- «Тірі ғаламшар»
- «Бейбітшілік пен мейірімділік біздің қолымызда»
Жеңімпаздар дипломдармен және бағалы сыйлықтармен марапатталды. Барлық қатысушыларға арнайы сертификаттар табысталды.
Жеңімпаздарды марапаттаған Алматы қаласы Білім басқармасы басшысының орынбасары Бибігүл Малғаждарова өскелең ұрпақтың бойында патриоттық сезімді тәрбиелеуде маңызды рөл атқаратын осындай іс-шараларды өткізудің маңыздылығына тоқталды. Ол екі күнге созылатын жарыстың өтетін орнын да атап өтті.
«Бұл республикалық деңгейдегі жарыстың Алматыда және еліміздегі ең жақсы ауылдық балалар лагерінің бірі – «Өрнек» мектеп оқушылары лагерінде өткені көңілге қонымды. Бұл олардың жаңа оқу жылында оқуын нәтижелі жалғастыруына мүмкіндік береді», - дейді Бибігүл Малғаждарова.
«Бояулар құпиясы» республикалық жас суретшілер байқауы – балалардың шығармашылық әлеуетін дамытуға, қиялын еркін жеткізуге, патриотизм мен ұлттық құндылықтарды құрметтеуге бағытталған бірегей жоба. Байқау барысында жасөспірімдер өздерінің өнерге деген сүйіспеншілігін көрсетіп қана қоймай, жаңа достар тауып, шығармашылық байланыстарын нығайтты.