Тәжікстан мен Өзбекстанның 18 азаматы елдеріне қайтты.
Қаланың көші-қон қызметінің хабарлауынша, бұл адамдар елімізде заңсыз жүрген.
Полиция қызметкерлері заңсыз көші-қон арналарын, шетелдіктерді заңсыз жұмысқа орналастыру деректерін анықтау мақсатында“Мигрант” іс-шарасы өткізуде, деп хабарлайды Almaty-akshamy.kz Polisia.kz-ке сілтеме жасап.
Тәжірибе көрсеткендей, заңсыз жүрген келімсектер көбінесе қылмыстық қол сұғушылықтың нысанына айналады немесе оларды өздері жасайды.
"“Мигрант” жедел алдын алу іс-шарасы аясында көші-қон заңнамасын бұзғаны үшін Өзбекстан мен Тәжікстанның 18 азаматы әкімшілік жауапкершілікке тартылды. Олар қаланың ауданаралық мамандандырылған әкімшілік сотының шешімімен мемлекетімізден шығарылды. Аталған елдердің ҚР-дағы консулдық қызметінің күштерімен азаматтар Өзбекстан Республикасының шекарасына дейін рейстік автобуспен жеткізілді. Оларға дипломаттармен елге оралу туралы куәлік берілді", – деді Алматы қалалық ПД көші-қон қызметі басқармасының бастығы Асхат Бутунчинов.