Алматыда көші-қон заңнамасын бұзғаны үшін ұсталған Өзбекстан мен Тәжікстанның 48 азаматы елдеріне жеткізілді.
Осы мақсатта Алматы полициясы мемлекеттік шекараға дейін жету үшін автобуспен қамтамасыз етті, деп хабарлайды Almaty-akshamy.kz Polisia.kz-ке сілтеме жасап.
Бұған дейін бірнеше рет хабарланғандай, осы күндері қалада ҚР-да заңсыз жүрген шетелдіктерді анықтауға және заңсыз көші-қон арналарының жолын кесуге бағытталған “Заңсыз келуші” жедел алдын алу іс-шарасы жүргізіліп жатыр.
«Іс-шараның үш күнінде Қазақстанның көші-қон заңнамасын бұзғаны үшін 464 шетелдік жауапқа тартылса, олардың 88-і сот шешімімен елден шығарылды. Жеке басын куәландыратын құжаты жоқ тағы 237 шетел азаматы ПД-ның қабылдап-таратуына орналастырылды. Сонымен қатар шетелдіктердің Қазақстан Республикасында заңды болуын қамтамасыз етпеген 128 отандасымызға қатысты әкімшілік шара қолданылды», – деді Алматы қалалық ПД көші-қон қызметі басқармасының бастығы Асхат Бутунчинов.