Алматы қаласы полиция департаментінде ақпараттық саясат, қызметтік тәртіп және жеке құрам арасында заңдылықтың сақталуы мәселелеріне арналған қорытынды кеңес өтті.
Жиынды Алматы қаласы ПД бастығының орынбасары Әділғожа Құсайынов жүргізді, - деп хабарлайды aqshamnews.kz.
Кеңес барысында өткен кезеңдегі жұмыс нәтижелері қаралып, қызметтік тәртіпті бұзудың типтік жағдайлары талданды. Сондай-ақ жауапты, кәсіби және заң талаптарын мүлтіксіз сақтайтын полиция ортасын қалыптастыруға бағытталған негізгі тәсілдер айқындалды. Барлық деңгейдегі басшылардың өз бөлімшелеріндегі тәртіптің жай-күйі үшін жеке жауапкершілігіне, құқық бұзушылықтардың алдын алуға, қызметтік адалдыққа жат кез келген әрекетке төзбеушілік қағидатын қалыптастыруға ерекше назар аударылды.
— Тәртіп — бұл формалдылық та, статистика да емес. Бұл — күнделікті қызметке, адамдарға және заңға деген көзқарас. Әрбір басшы тек көрсеткіштер үшін ғана емес, өз қарамағындағы қызметкерлердің тәртібі үшін де жауап береді. Жүйе ішіндегі кез келген заң бұзушылық азаматтардың полицияға деген сенімін әлсіретеді. Сондықтан заңдылық қағидаты баршаға бірдей, ешбір ерекшеліксіз орындалуы тиіс, — деп түйіндеді Әділғожа Құсайынов.
Кеңес қорытындысы бойынша қызметтік құқық бұзушылықтардың алдын алуды күшейтуге, басқарушылық жауапкершілікті арттыруға және полиция қатарында тұрақты заңға бағыну мәдениетін қалыптастыруға бағытталған нақты тапсырмалар берілді.
