Жыл басынан бері 90-нан астам қылмыс облыс аумағында қызметтік-іздестіру иттерінің көмегімен ашылды.
Қызметтік-іздестіру иттері полиция жұмысында ерекше маңызға ие. Олар қылмыстарды ашу, жарылғыш заттарды, есірткіні және басқа мақсаттарды іздеу үшін қолданылады.
"Жыл басынан бері төрт аяқты көмекшілер 363 рет оқиға орнына шыққан, 91 қылмысты ашуға қатысқан. Қызметтік-іздестіру иттері арқылы ашылған қылмыстардың көпшілігі ұрлық болып табылады. Жедел-іздестіру іс-шаралары барысында есірткі заттардың заңсыз айналымына байланысты – 12 факт анықталған, оның 5-і есірткі қылмысы", – деді Алматы облысы ПД КҚО бастығы Ерлан Мусапиров.
Кәсіби деңгейін арттыру мақсатында кинолог-инспекторлар тұрақты негізде арнайы оқыту және қайта даярлау курстарынан өтеді. Қызметтік иттерді қолдану полицияның күнделікті жұмысының ажырамас бөлігі. Тәжірибе көрсеткендей, олар қылмыспен күресуге және азаматтардың заңды құқықтарын сақтауға айтарлықтай үлес қосады.