Алматы облысында жастарға арналған «Алатау жастары» бағдарламасы қайта басталады

Автор aqshamnews.kz
15:10, 01 қазан 2024

Сурет: Egemen.kz

Алматы облысының әкімдігі мен «Отбасы банк» АҚ 35 жасқа дейінгі жастарға жеңілдетілген несие беру арқылы тұрғын үй сатып алуға мүмкіндік беретін «Алатау жастары» бағдарламасын қайта іске қосады.

Бағдарламаға қатысу үшін Алматы облысында ресми жұмыс өтілі кемінде 1 жыл болуы қажет және бұл зейнетақы жарналарының тұрақты төленуімен расталуы керек. Сондай-ақ, өтініш беруші мен оның отбасы мүшелерінің соңғы 5 жыл ішінде аттарына тіркелген жылжымайтын мүлкі болмауы тиіс, деп хабарлайды aqshamnews.kz.

Өтініштерді қабылдау 1-15 қазан аралығында өтеді. Үміткерлер өтініштерін Қонаев қаласы, 1-шағын аудан, №41, «Бәйтерек» бизнес орталығы, 1-қабат, акт залында орналасқан облыс әкімдігінің ішкі саясат басқармасына тапсыра алады.

Бағдарламаға қатысушылар қалай іріктеледі?

Жұмыс өтіліне байланысты: 1 жыл жұмыс өтілі үшін 2 балл, ал әрбір келесі жыл үшін 1 балл беріледі (5 жылға дейін ескеріледі).

Отбасылық жағдайына байланысты: тіркелген некеде болса 5 балл, ал тұрмыс құрмағандарға 1 балл.

Балалары барлар үшін: бір балаға 2 балл, екі немесе одан да көп бала үшін 1 балл беріледі.

Мемлекеттік қызметшілер мен бюджеттік ұйымдардың қызметкерлеріне 5 балл.

Жалдамалы пәтерді өтейтін мемлекеттік қызметшілерге 10 балл.

Депозитінде кемі 500 мың теңге салымы бар банк клиенттеріне 2 балл беріледі.

Іріктелген қатысушылар Отбасы банкінде төлем қабілеттілігін бағалатуы қажет. Банк 18 млн теңгеге дейін несие береді, ал егер мүліктің құны жоғары болса, айырмашылықты өз қаражатыңыздан төлеуіңіз қажет.

Бастапқы жарна 10% құрайды, ал несие мөлшерлемесі жылдық 6%-ды (ЖТСМ 6,2%-дан 6,8%-ға дейін) құрайды. Несиені өтеу мерзімі 19 жылға дейін.