Алматы облысында екі адамның өлімімен аяқталған жол апаты тергеліп жатыр, деп хабарлайды Aqshamnews тілшісі.
Алматы облыстық полиция департаментінің мәліметінше, «Алматы – Өскемен» автожолының 94-шақырымында болған жол-көлік оқиғасы бойынша қылмыстық іс тіркелген.
Алдын ала деректерге сәйкес, Changan көлігінің жүргізушісі рөлге ие бола алмай, өзімен бір бағытта келе жатқан жүк көлігінің тіркемесіне соқтығысқан. Соққыдан кейін көлік инерциямен жол жиегіндегі қоршауға соғылған.
«Артынша Toyota Estima көлігі Changan-ға соғылып, кейін инерциямен жол жиегінде тұрған тіркемеге соқтығысқан. Сонымен қатар, соққы салдарынан Changan көлігінің қозғалтқышы қарсы жолаққа ұшып, сол жерде келе жатқан Ford Focus автокөлігімен жанасқан. Жол апатының нәтижесінде Changan-дағы екі жолаушы оқиға орнында көз жұмды. Ал аталған көліктің жүргізушісі мен Toyota Estima жүргізушісі түрлі жарақаттармен медициналық мекемеге жеткізілді. Қазір оқиғаның барлық мән-жайын анықтау үшін жан-жақты, толық әрі объективті тергеу жүріп жатыр», — делінген полиция мәлімдемесінде.
