ТЖМ басшысы генерал-лейтенант Шыңғыс Әрінов Алматы облысының Кеген ауылында жаңа өрт сөндіру депосын ашты, - деп хабарлайды aqshamnews.kz.
Ашылу рәсіміне Алматы облысының әкімі Марат Сұлтанғазиев, ТЖД басшылығы, қызмет ардагерлері, сондай-ақ ауыл тұрғындары қатысты. Аталған нысан Қазақстан ТЖ министрлігінің стратегиялық жоспары аясында жергілікті бюджет қаражаты есебінен салынды.
Іс-шара барысында сөз сөйлеген министр азаматтық қорғау жүйесін нығайту және ауылдық жерлердегі қауіпсіздік деңгейін арттыру Мемлекет басшысы қойған басым міндеттердің бірі екенін атап өтті. Сондай-ақ Шыңғыс Әрінов жаңа өрт сөндіру депосының, заманауи өрт-құтқару техникасының, оның ішінде өрт автоцистернасының, жедел-құтқару автокөлігінің және жол талғамайтын көліктің кілттерін табыс етті.
Жаңа өрт сөндіру депосы жалпы саны 28 мыңнан астам халқы бар 12 ауылдық округ пен 34 елді мекенді өрттен қорғауды қамтамасыз етеді. Ғимарат модульдік технология бойынша салынған, бұл қажет болған жағдайда нысанды жедел түрде кеңейтуге және жаңғыртуға мүмкіндік береді. Депо тәулік бойы қызмет атқаруға қажетті барлық жағдаймен толық жабдықталған: заманауи байланыс құралдары бар диспетчерлік пункт, екі өрт сөндіру автокөлігіне арналған гараждар, санитарлық-тұрмыстық үй-жайлар, ас үй және демалыс бөлмелері бар. Сонымен қатар спорттық жаттығу құрал-жабдықтармен жарақталған «Batyr Team» жаттығу аймағы бар.
Іс-шара аясында нысанның құрылысына жоғары жауапкершілікпен қатысып, белсенділік танытқан азаматтар ТЖМ ведомстволық наградаларымен марапатталды. ТЖМ ауылдық елді мекендердегі инфрақұрылымды дамыту, өртке қарсы қауіпсіздік жүйесін нығайту және елдегі халықтың қорғалу деңгейін арттыру бағытындағы жұмысын жалғастыруда.