Ішкі істер министрі Ержан Саденов Алматы облысы Полиция департаментінің басшы құрамымен 2024 жылдың тоғыз айындағы жедел қызметтің қорытындылары бойынша кеңес өткізді. Кеңес барысында министр Полиция департаментінің жаңа басшысын таныстырды, деп хабарлайды aqshamnews.kz
ҚР Президенті Әкімшілігінің келісімімен және Ішкі істер министрінің бұйрығымен Алматы облысы Полиция департаментінің бастығы лауазымына полиция полковнигі Мейрам Әбікеев тағайындалды. Бұған дейін ол Солтүстік Қазақстан облысы Полиция департаменті бастығының орынбасары қызметін атқарған. Сонымен қатар, Полиция департаменті бастығының бірінші орынбасары болып Бағдат Әшімов тағайындалды.
Ішкі істер министрінің бұйрығымен келесі лауазымды тұлғалар қызметінен босатылды:
- ПД бастығының бірінші орынбасары Серік Шалхаров;
- Талғар аудандық полиция басқармасының бастығы Нұржан Күнтүнов;
- ПД экстремизмге қарсы іс-қимыл басқармасының бастығы Ұлан Байтақов;
- ПД криминалдық полиция басқармасының бастығы Руслан Смағұлов;
- ПД ұйымдасқан қылмысқа қарсы күрес басқармасының бастығы Дулат Қайыр және оның орынбасары Жанат Омаров.
Кеңес қорытындысы бойынша министр өңірдегі құқықтық тәртіп пен қоғамдық қауіпсіздікті қамтамасыз етуге байланысты нақты тапсырмалар берді. Сондай-ақ, Ержан Саденов Талғар ауданында кәмелетке толмаған баланы өлтіру фактісі бойынша тергеу жұмыстарын жеке тыңдап, тергеу тобына арнайы тапсырмалар жүктеді.