Алматы метросының станцияларында жолаушылардың қауіпсіздігін арттыру мақсатында арнайы қоршаулар орнатыла бастады, деп хабарлайды aqshamnews.kz қалалық метрополитеннің баспасөз қызметіне сілтеме жасап.
Металдан жасалған тіреуіштер қазіргі уақытта "Момышұлы", "Сарыарқа", "Райымбек", "Москва" және "Алмалы" станцияларында орнатылған. Алдағы уақытта бұл тіреуіштерге мықты әйнектен жасалған панельдер бекітіледі.
Қоршаулар станция платформаларындағы вагондар арасындағы тірек нүктелерінің дәл қарсысында орналасады. Бұл құрылымдар пойыз тоқтаған кезде жолаушылардың рельске абайсызда құлап кетуінің алдын алу үшін жасалып жатыр.
Метрополитен өкілдерінің айтуынша, қоршауларды орнату жұмыстары алдағы апта ішінде толық аяқталады.