Алматыда жастардың адалдық мәдениетін қалыптастыруға бағытталған маңызды шара өтті. «Адал Ұрпақ» жобасы аясындағы «Біз сыбайлас жемқорлыққа қарсымыз» байқауының жеңімпаздары марапатталып, жас қатысушылар өздерінің азаматтық ұстанымын шығармашылық жұмыс арқылы танытты. Қоғамда адалдық пен жауапкершілік құндылықтарын нығайтуды мақсат еткен бұл жоба биыл да жастардың қызығушылығын арттыра түсті.
«Адал Ұрпақ» әлеуметтік жобасын «Ақпараттық-ресурстық орталық» қоғамдық қоры Алматы қаласы Жастар саясаты басқармасының қолдауымен жүзеге асырып келеді. Жоба жастарды тек адалдыққа тәрбиелеумен қатар, сыбайлас жемқорлыққа қарсы мәдениетті қалыптастыруды көздейді.
Биылғы байқауда қатысушылар эссе және бейнеролик форматында жемқорлықтың қоғамға зияны, адалдықтың маңызы туралы өз көзқарасын ұсынды. Жеңімпаздар мен белсенділер салтанатты рәсімде марапатталды.
«Адал Ұрпақ» жобасы – Президенттің заң мен тәртіп идеологиясын қолдауға бағытталған маңызды бастама. Адал азамат – алдымен өз ісіне жауапты, сөзі мен ісі сәйкес келетін адам. Бүгін марапатталған жастар осы бағыттағы өз көзқарасын нақты жеткізе білді», – деді Алматы қаласы Жастар саясаты басқармасының басшысы Кажденбек Азиз.
Ұйымдастырушылардың айтуынша, жоба аясындағы іс-шаралар жастар арасында адалдық, әділдік және азаматтық жауапкершілік құндылықтарын нығайтып, қоғамның дамуына үлес қосатын жаңа буынды қалыптастыруға серпін береді.
