Алматыдағы аты аңызға айналған Қазақ мемлекеттік циркінің аренасында әлемдік цирк өнерінің жұлдыздары өнер көрсетеді.
23-27 шілде аралығында күн сайын сағат 18:00-де көрермендерге Қазақстаннан, Франциядан, Германиядан, Қытайдан, Вьетнамнан, Аргентинадан, Эфиопиядан, Бельгиядан, Өзбекстаннан, Қырғызстаннан, Ресейден, Украинадан және басқа да елдерден келген акробаттар, әуе гимнасттары, жонглерлер, клоундар, эквилибристтер мен өзге де өнерпаздардың бірегей қойылымдары ұсынылады.
Жалпы алғанда, 16 елден келген цирк шеберлері Almaty Circus Festival атты III Халықаралық цирк өнері фестивалінде ұмытылмас шоу жасайды. Билеттер цирк кассасында және Freedom Ticketon платформасында қолжетімді.
Биылғы фестиваль Қазақ мемлекеттік циркінің 55 жылдығына арналады. Ауқымды іс-шара Алматы қаласы әкімдігінің қолдауымен өтуде. Сонымен қатар цирк күмбезі астында бұған дейін халықаралық фестивальдерде көрсетілмеген эксклюзивті әрі тарихи қойылымдар алғаш рет сахналанады.
Фестиваль қатысушыларына отандық цирк өнерінің негізін қалаған ардагерлер мен шет елдерден келген саланың мықты менеджерлері баға береді.