“Өзбекстандағы Қазақстан медицинасының күндері” аясында Қазақстан кардиология және ішкі аурулар ғылыми-зерттеу институтының эндоскопия және интервенциялық гастроэнтерология бөлімшесінің меңгерушісі Алма Хабижанова мен дәрігер-эндоскопист Қанат Сейтбеков Ташкенттегі клиникалардың мамандарына шеберлік сабақтарын өткізді, - деп хабарлайды Аqshamnews.kz.
Іс-шара барысында олар ішек қабыну ауруларын диагностикалаудың заманауи әдістері (баллонды энтероскопия, видеокапсулалық эндоскопия және эндоультрадыбыстық зерттеулер) бойынша ҒЗИ жетістіктерін таныстырды.
Қазақстандық эндоскопистер «Ішек қабыну ауруларында эндоскопияның рөлі» тақырыбында «M-Clinic» медициналық орталығының эндоскопист-дәрігерлері мен гастроэнтерологтары үшін дәрістер оқыды. Шеберлік сабағы аясында ішек қабыну ауруларын диагностикалаудың заманауи тәсілдері ұсынылып, клиникалық жағдайлар мен эндоскопиялық бақылау алгоритмдері талқыланды. Диагностиканың нақтылығын арттыру және инновациялық эндоскопиялық технологияларды енгізуге ерекше назар аударылды.
Сонымен қатар, өзбек әріптестерімен эндоскопиялық зерттеулерді стандарттау, кабинеттерді жабдықтау және мамандардың дайындығының сапасын арттыру мәселелері бойынша кәсіби пікірталастар өтті. Бірлескен ғылыми-тәжірибелік іс-шаралар ұйымдастыру, тәжірибе алмасу және Қазақстан мен Өзбекстан арасындағы халықаралық әріптестікті дамыту мәселелері талқыланды.
