Алматы Азаматтық Альянсы қоғамдық диалогты қалай нығайтып, Тұрақты даму мақсаттарын қалай енгізуде?
2024 жылы Алматы Азаматтық Альянсы Тұрақты даму мақсаттары (ТДМ) бойынша қоғамдық мониторинг орталығын іске қосты, деп хабарлайды aqshamnews.kz.
Орталық үкіметтік емес ұйымдардың (ҮЕҰ) жобаларының тиімділігін талдаумен айналысады. Бұл туралы Алматы Азаматтық Альянсының төрағасы Каиржан Абдыхалыков Өңірлік коммуникациялар қызметінде (ӨКҚ) өткен баспасөз конференциясында айтты.
Ұйымның басты мақсаты – мемлекеттік құрылымдар, ҮЕҰ және азаматтар арасындағы өзара іс-қимылды дамыту арқылы әлеуметтік және қоғамдық мәселелерді бірлесіп шешуге ықпал ету. Сонымен қатар, Альянс экология, инклюзивті білім беру және қоғамдық бастамаларды қолдау бағытында да белсенді жұмыс жүргізуде.
Альянс жұмысына әртүрлі ҮЕҰ мен белсенді азаматтар қатысады. Қаланың маңызды мәселелерін талқылауға тұрғындарды тарту үшін қоғамдық тыңдаулар, дөңгелек үстелдер және форумдар ұйымдастырылады.
2023 жылдың маусым айында Алматыда «Тұрақты даму мақсаттарын жүзеге асыру» тақырыбында XIII Азаматтық Форум өтті. Онда аймақтағы тұрақты дамуға қол жеткізудің стратегиялары мен жолдары қарастырылды.
«Келесі форум мамыр-маусым айларында өтеді деп жоспарлануда. Ол Алматыдағы азаматтық қоғамның институционалдық мәселелері мен даму перспективаларына арналмақ. Форум қарсаңында өзекті тақырыптарды талқылайтын бірқатар дөңгелек үстелдер мен диалогтық кездесулер өткіземіз. Бұл диалог алаңдарына өзара сындарлы пікір алмасу мен шешім іздеуге жәрдемдесу мақсатында құрылған Үйлестіру кеңесі мен Алматы сарапшылар клубы белсенді қатысады», – деп атап өтті К. Абдыхалыков.
Альянстың басым бағыттарының бірі – экологиялық мәселелерді шешуге жәрдемдесу, инклюзивті білім беруді қолдау және әлеуметтік осал топтардың құқықтарын қорғау. Мемлекет басшысының бастамасымен қолға алынған «Таза Қазақстан» бағдарламасы аясында Альянс ҮЕҰ және еріктілермен бірлесіп, қаланы көгалдандыру және аумақтарды тазалау шараларын ұйымдастыруда. Бұл іс-шараларға жастар мен белсенді азаматтар кеңінен тартылуда.
«Алматы Азаматтық Альянсы азаматтық қоғамды нығайтуда маңызды рөл атқарады. Ол мемлекеттік органдар мен халық арасындағы диалог алаңы ретінде жұмыс істейді. Ұйым мемлекеттік құрылымдардың ашықтығы мен есептілігін арттыруға ықпал етіп қана қоймай, билік пен қоғам арасындағы ынтымақтастықты жақсартуға бағытталған заңнамалық бастамаларды әзірлеу және ілгерілету ісіне белсене қатысады», – деді ӨКҚ спикері.
2025 жылы ТДМ жүзеге асырылу мониторингін жалғастыру, мемлекеттік органдар мен азаматтық қоғам жобаларының тиімділігін бағалау жоспарланып отыр. Әсіресе, ҮЕҰ өкілдерінің білімін жетілдіруге, волонтерлік қозғалысты дамытуға және қоғамның әртүрлі секторлары арасындағы серіктестікті нығайтуға ерекше назар аударылады. Бұл жұмыстар тұрақты дамудың ортақ мақсаттарына қол жеткізуге бағытталатын болады.