31 мамыр күні Алматы қаласындағы Қарағайлы саябағында 1931–1933 жылдардағы ашаршылық пен саяси қуғын-сүргін құрбандарына арналған ескерткішке гүл шоқтары қойылды. Еске алу шарасына ғылыми және мәдени қауым өкілдері, жастар, қала тұрғындары мен тоталитарлық жүйе құрбандарының ұрпақтары қатысты.
Іс-шараның ашылуында Алматы қаласының әкімі Дархан Сатыбалды сөз сөйледі.
— Бұл күн – халықтың қандай ауыр қасіретті бастан өткергенін еске салатын күн. Қуғын-сүргін мен ашаршылық туралы естелік тек архивтерде ғана емес, әр азаматтың жүрегінде сақталуы керек. Біз өткенімізді білу арқылы ғана жарқын болашаққа қадам баса аламыз, — деді қала басшысы.
Саябақта сәбиін құшағына алған әйелдің және аяқ жағындағы төңкерілген қазанды бейнелейтін мүсіндік композиция – қасірет, күйреген тұрмыс пен халықтық трагедияны бейнелейді. 2017 жылы орнатылған монумент авторлары – мүсіншілер Дулат Үсенбаев, Айдос Бүркітбаев және Қанат Бекұлы.
Қазақстан Республикасы Ұлттық ғылым академиясының академигі, тарих ғылымдарының докторы Ханкелді Әбжанов тарихи жадыны сақтау – қоғам дамуының негізі екенін атап өтті:
— Қуғын-сүргін мен ашаршылық қазақ халқы үшін аса ауыр сынақ болды. Біз халқымыздың бір бөлігін, мәдениетімізді, рухани тіректерімізді жоғалттық. Бұл оқиғалар туралы шындықты сақтау – өткен мен болашақ алдындағы тарихи жауапкершілік, — деді ғалым.
Тарихшылардың бағалауынша, 1930 жылдардың басындағы саяси қуғын-сүргін мен ашаршылық салдарынан Қазақстанда 1,5 миллионнан астам адам қаза тапқан. Осы күні еліміздің барлық өңірлерінде еске алу шаралары, көрмелер мен тақырыптық кездесулер өтуде.