Өрт жабық мұз айдынының кіші залының бірінші қабатында спорттық инвентарьдың жануынан шыққаны мәлім болды.
Өрт сөндіру бөлімшелері келгенге дейін ғимараттағы барлық келушілер мен қызметкерлер эвакуацияланған.
Газ-түтіннен қорғау қызметінің мамандары өрт орнында шұғыл әрекет етіп, құтқару жұмыстарын жедел орындап шықты.
Төтеншеліктер өртке оранған аумақтың ауқымдылығына қарамастан, жалынның іргелес бөлмелерге таралуына жол бермеген. Жағдайды ойын батутының да бір мезетте қатар жана бастағаны одан әрі қиындатты. Өрт сөндірушілердің біліктілігі арқасында қауіп дер кезінде тежелген.
Алматы қалалық төтенше жағдайлар департаменті бастығының міндетін уақытша атқарушы Бағдат Шайзада оқиға орнында жасаған ресми мәлімдемесінде: «2025 жылдың 25 қаңтарында сағат 15:16-да Алматы қаласындағы Мұзды сарайда 40 шаршы метр аумақта ойын батутының жануы тіркелді. Жедел жүргізілген құтқару жұмыстарының нәтижесінде 400 адам эвакуацияланды, кәмелетке толмаған төрт бала құтқарылды. Өрт толығымен сөндіріліп, қауіпсіздік қамтамасыз етілді» деп хабарлады.
ТЖД өкілдері құтқарылған 4 баланың есімдерін атады. Олар: Серік Санжар (2013 жылғы),Серік Әсет (2019), Ынтымақ Бексұлтан (2012) және Серік Айбар (2016). Алғашқы үш балалардың жағдайы қанағаттанарлық, олар оқиға болған жерде дәрігерлер бақылауында. Ал Серік Айбар Қалқамандағы 1-қалалық аурухананың жансақтау бөліміне жеткізілді.