Алматы қаласы әкімінің орынбасары Бейбіт Шаханов жапониялық әйгілі сәулетші, «TEZUKA ARCHITECTS» сәулет бюросының негізін қалаушы Такахару Тезукамен кездесті.
«TEZUKA ARCHITECTS» – білім беру нысандары мен қоғамдық кеңістіктер жобалау саласына маманданған халықаралық сәулет бюросы. Компания жұмысының негізгі қағидаттары: ашық жоспарлау, кеңістіктің сезімдік үйлесімі және қарапайымдылық пен жоғары функционалдылықтың сабақтастығы.
Кездесу барысында тараптар Алматыдағы білім беру ұйымдарын жаңғырту үдерісінде «TEZUKA ARCHITECTS» тәжірибесін пайдалану мүмкіндіктерін, балалардың мектептен тыс шығармашылық және дамытушы ортасын кеңейту жолдарын, сондай-ақ мектепке дейінгі мекемелердің сәулетіне ашық кеңістік қағидатын енгізу мәселелерін талқылады.