Алматы әкімінің бұрынғы орынбасары Ержан Бабақұмаров қаза тапты, - деп хабарлайды aqshamnews.kz тілшісі Kazinform агенттігіне сілтеме жасап.
Алдын ала мәліметтер бойынша, өлім себебі - соққыға жығылу. Күдікті ұсталды.
Қайғылы оқиға 30 қазанға қараған түні болған. Алдын ала ақпаратқа сәйкес, Ержан Бабақұмаров таныстарымен бірге кеш өткізген. Алайда отырыс кезінде олардың арасында жанжал туып, төбелеске ұласқан. Салдарынан Бабақұмаров алған жарақаттарынан көз жұмған.
Басылым мәліметінше, күдікті ұсталып, уақытша ұстау изоляторына қамауға алынған.
Полиция бұл ақпаратты растады.
"Адам өлтіру дерегі бойынша қылмыстық іс қозғалды. Алдын ала мәліметтерге сәйкес, бұрыннан таныс ер адамдар сөзге келіп, жанжал төбелеске ұласқан. Салдарынан 56 жастағы ер адам алған жарақаттарынан көз жұмған. Күдікті ұсталып, уақытша ұстау изоляторына қамалды. Қазір соталды тергеу жүріп жатыр", - деп хабарлады полиция.
Ержан Бабақұмаров 2019 жылғы шілдеден 2022 жылғы ақпанға дейін Алматы қаласы әкімінің орынбасары қызметін атқарған. Сондай-ақ, ол Орталық коммуникациялар қызметін басқарған және премьер-министр кеңсесінде жұмыс істеген. Әр жылдары Президенттің кеңесшісі және мәдениет пен ақпарат вице-министрі болған.